газета "Няръяна Нгэрм" и "Мынико"

Пензер
☝Ненэй ненэцяӈгана пензер’’ тадебяхана таранари ӈамгэ ӈэ’’нив’’. Хурина тэри тарем’ сэвта ед’ пензьретна ненэй ненэцие’’ поӈгана ханяхартана яӈгу. Сававна сертавы пензередо’ тадебя’’ сяни’’ по’’ ямбан’ мэйдо’. Пензярта во’’мам’ тосалбта тадебя ненэць’ минханда ханена няха’’тата хора’, ӈармы илебця’ хобадамда хонраӈгу, тарцядамда пюрманда ня’’амна харта тэри мунм’ нита помна ӈэдабтаӈгу. Хурина пензер’’ хора илебця’ хобарихит сертабада. Хобадамда хо’’махаданда тадебя ненэць’ тикамда хэвня’ сертаванзь тадарабтаӈ гуда. Харта нянанда пензерм’ сертаба вэва, невхы ненэцие’’ вадавна тиканда, харта сертавэнда, тарода яӈгода.
🙏Пензерм’ сертаванзь ятнана хасава илебця’ хобам’ нарма’ няна, нувота ибево’’махад, тарта харта индя сер’ яӈгарава’ е’’эмня, сада’ ит’ паклеӈгуда. Сада’ мюд хобам’ ненэць’ тай’ нэкло’’махаданда, сян ёӈорэй’ сомбовна халтаӈ гуда. Няхар’’ сян яля’ садахана ӈэ’’мяхаданда, хоба тарта харта нялер’’манда сер’, ха’’маӈгу. Тадтикахад, итя тай’ сомбовна палӈ ыркая’’, хобамда тодо ян’ вэӈ галахая, лабцёйӈэ лехэбтахая, хасуй я’ ни’ тёнтада. Сидя ня’ тикамда пилипон’’ сядхаламбахая’’ тырабтамбаӈ гуда. Ӈамгэ’ мянувна хас’’махаданда халя’ едё’’ пинма’ евэйхана, пивы халя’ тяркана хобамда масартада, тодо ян’ вэнкая, хасуй я’ ни’ ӈани’ лехэбтаӈ гуда.
☀Тарем’ я’ ниня тырабтамахад, сомбовна паркая, сян яля’ таса’ ниня хаерад’ явохона тыранабта тара. Тадтикад халэта нёхоло ха’’аврахая, ӈамгэ’ мянувна пыйхая, хоба мякна ӈу’ тяхана тыранана. Таняд ха’’авра’’махад халя’ юркана масаркая, пыйхая, сянди’’ яхат тодо ян’ ӈани’ вэнкая, я’ ни’ лехэбтамбада. Тарем’ пензерӈэ сертаванзь таславы хоба мюмде’’махад ӈамгэ’ пират ланомдамба хан’ мюня ӈэӈгу. Хасава’ пензер’ педерм’ сертаба пяӈгу. Пили’’ нерде’ ябталюйвана харв пям’ сябарта, тиканда ямбдада ӈоб’’ тибяхад тэри ва’’ӈа. Салмуйӈэ серта’’махаданда тикы ябталюй пямда тодана тодабця’ ниня, янамбовна ядемдамбхая, сюрибтяваӈэ выертада. Сидя маламда выйромахад ӈобт’ мярёй иняхана сяротаӈаюда.
👌Тарем’ ӈанэдавы пензер’ педерт’ миртя хасава мярёй хобамда мярёй иня’ теремяхана лабтеӈгуда. Невхы ненэця’’, ӈамгэхэв мимбабато’, ӈамгэхэрт еся теб вуни’’ мэс’’. Тадтикахад пензер’ мюняю’ сядота хэвханда сидя нярхалада пям’ ӈэсанда. Тикы сидя нярхалада пяӈэ тет ян’ пензерм’ тярпиди’, тарць’’ хавна, тадебя’ пензьретва’ ёльцяӈгана, тамна пензер’ ня’’амбасьӈэ таранаха’. Тадтикад пензер’ мюняӈы хэван’, нярхалада пяха’ ня’, тадебя хуркари хыӈгани, сеӈгакоци сярота. Тикыда пензретванда ёльцяӈгана хуркаривна мунота’’.
💫Тадебя ӈани’ вули’’ таранада - пензерта ладорабць’, тадейбтёвахананда пензерта ладорпа мэтада. Тикаӈэ, ху’ пянытарев’ сертахая, харв пяхад мимбада. Ӈудахана ня’’амбада малда ябталюй, ӈ ыльняӈ ы хэвда лабцёй. Пили’’ пуда’ пензер’’ ладорабць’, ехэна’ ибяна тадтахая, варк’ пенаха’’на синдабада.
☝Едэй сертавы пензер’’ тикарихина мэта ниӈа’’. Нарма’ няна, янда иле’’мяхад, тадебя ненэць’ тикамда пи’ тяха’ хибидя ян’ хаеӈгуда. Няби яляхана ӈ эсында тер хасава нида’’ хибидя я’ ниня тодабцям’ пятаӈгу’’, тикы’ хэвхана едэй пензерта мэць тадебя самбдорта. Таняна тым’ хадаӈ гу’’, тадтикахад едм’ пиреӈгу’’, пиревы евэйхана хибидя я’ ниня ӈэда хэхэкуци хаӈорота’’. Тадтикахад пензерта ӈани’ няхар’’ ялян’ хибидя я’ ӈэва’ ниня хаеӈгуда. Пензерта хосая товандо’ ёльцяӈ гана тадебяхана ядэрта ненэця’’ хибидя ям’ ӈани’ хаӈорокая хаеӈгудо’. Таняна тадебя ненэць’ едэй пензеркананда ӈани’ самбдорта, пили’’ ёльцеванда нерцюна пензерта няхата митада. Тикана, тадебяндо’ самбдорць сём’ мэкая, сямян мэна хасава’’ малӈэ пензерм’ няхар’’ ёӈорэй’ ладбато’ тара. Тикандо’ пуд тадебядо’, едэй пензерта хананда мю’ мэхэя, нита нерня ӈэдалаӈгу’’. Ӈахат мэ’’мэмда пензерта хибидя я’ ниня хаеӈгуда. Пыда тад нерня’ едэй пензерта ӈыхы во’’манда ёльцянд’ пилипон’ мэтада.
✍ Раиса Яптунэ’ падвы
📸 Сидяӈг: Марина Яр’ тадтавы