📰❄Газетнан у номерыштыже лудаш темлена:

✅«Чапле корнылан куаненна», – тыге ойла Шернур районысо Полдыран ялын ончычсо старостыжо Валентин Аклин. Валентин Александрович – чолга, тӱҥалме пашам мучаш марте шукташ тыршыше еҥ. Шернурышто чоҥышо предприятийыште, военкоматыште, ритуальный услугым пуышо организацийыште водительлан ыштен. Ялыш илаш пӧртылмеке, тавылан бетон оҥго-влакым ышташ тӱҥалын. Такшым тиде пашалан тӱҥалтышым Шернурышто илымыж годымак ыштен. Ялыште пашаже утларак воранен каен. Кумданрак - " Ял илыш" лаштыкыште.
✅Россий Федерацийысе калык-влакын шочмо йылмышт дене туныктышо-влакын съездыштышт республикна гыч кум марий туныктышо лийын. Тиде Любовь Сергеева (Волжский район Карай школын директоржо), Людмила Алмаматова (Шернур район Кукнур школышто туныктышо) да Ирина Оразаева (Морко район Унчо школышто туныктышо). Умбакыже "Образований" лаштыкыште лудса.
✅28 ноябрьыште Йошкар-Олаште, Калык тӱвыра пӧртыштӧ, «Калык кидпаша: эртыкше ден тачысыже» республикысе кидпаша форум эртен. Тушко регионын тӱрлӧ кундемже гыч 80 кидмастар погынен. Мероприятий гыч репортажым "Форум" лаштыкыште лудса.
✅Йошкар-Оласе Калыкле-прикладной сымыктыш тоштерыште Вера Шулятьеван «Шӧртньӧ олым пырче» экспресс-выставкыже почылтын. Вера Павловна олым пырче гыч ыштыме радына-влакым икымше гана 30 ий ончыч Зеленодольск олаште ужын. Тылеч вара тудат тыгай ойыртемалтше пашам ямдылаш кумылаҥын. Тудын кидпашаже-влакым "Ончер" лаштыкыште ужына кертыда.
✅Октябрь мучаште Виче кундем Вӱрзым район Тӱм-Тӱм ялыш Москва ола гыч шанчыеҥ-влак толын каеныт. Тиде – Россий науко академийын Языкознаний институтшын урал-алтай йылме-влак пӧлкан кугурак шанчыеҥже, филологий шанче кандидат Марина Куцаева ден коллегыже Дарья Белова. Шанчыеҥ-влакын марий ялыште мом ыштымыштым "Марий тӱня" лаштыкым шергалмеке пален налыда.