19 майыште Волжский районысо Олыкъялыште Российын геройжо В.Ивановым шарныме лӱмеш муро да строй дене ошкылмо смотр-конкурс эртен. Тушко ятыр отряд ушнен. Тыгак Волжск ола, Звенигово район Красноярский посёлкысо школла гыч толыныт.
Торжественный ужашыште Марий Эл Кугыжаныш Погын вуйлатышын алмаштышыже Лариса Яковлева Волжский район вуйлатыше Владимир Сергеев да молат лийыныт.
– Школыштына боевой чап музей уло. Тушто уна-шамычлан экскурсийым эртарышна. Рвезе-влакым службылан, элнам аралаш ямдылаш манын, теме дене келшышын, тӱрлӧ акцийым, военно-патриотический шӱлышан мероприятийым эртарена. Локальный сарын ветеранже-шамычым вашлиймашке ӱжына. Валерий Чечняште вооружённый конфликт годым йолташыж-влак верч ӱмыр лугыч лийын. Российын Геройжын чапкӱжӧ воктеке пеледыш аршашым пыштыме, – ойла Карай кыдалаш школышто историйым туныктышо Алевтина Гордеева. – Тыге самырык тукымым виян лияш, нелылыкым сеҥаш туныкташ тыршена. «Чёрная акварель войны» проект дене келшышын, школ тоштерыште мероприятий эртен. Валерийын Екатеринбургышто илыше пырля служитлыше Евгения Ившинын шӱжарже дене видеокылым ыштенна. Валерийлан улыжат 19 ий лийын. Дембельлан кум кече гына кодын улмаш. Аваже Нина Николаевна специальный военный операцийыште участвоватлыше патырна-влак верч тургыжлана. Чылаштым юмо арален шогыжо, манеш тудо.
– Игече пеш сай ыле. Тунемше-шамычын рыҥ тошкал кайымыштым ончен, кугешнымаш кумылат лекте. Смотр-конкурсыш тыгак военно-патриотический клублашке коштшо шуко тунемше ушнен. Валерийын йолташыже, палымыже-влакат миеныт ыле. Олыкъялыште Прохоров лӱмеш тоштер пӧртыштат Екатерина Кудрявцева оҥай экскурсийым эртарыш, – мане Карай кыдалаш школышто физкультурым туныктышо Алевтина Максимова.
Марий герой нерген «Марий Эл» газетыштат ик гана веле огыл палдаренна.
Валерий Вячеславович Иванов 1975 ий 29 ноябрьыште Волжск олаште шочын. Йоча жапшым ача-аважын шочмо кундемыштыже, Кугу Олыкъялыште эртарен. Тунемме жапше моло ӱдыр-рвезе семынак эртен, спорт дене пеҥгыде кылым кучен, каратэ дене шем ӱштыжӧ лийын. Йошкар-Олаште телохранитель школым тунем лектын.
1993 ий 8 декабрьыште салтак радамыш шогалын. 1994 ий декабрьыште Чечняш колтеныт. Рядовой Иванов Грозный, Шали, Аргун олалам да моло населённый пунктым утарымаште патырлыкым, лӱддымылыкым ончыктен. 1995 ий 19 майыште дивизийын позицийжым боевик-влак миномёт гыч лӱйкаленыт. Мине логалмылан кӧра «Акация» боевой технике йӱлаш тӱҥалын, механик-водительже контузитлалтын. Валерий водительым алмаштен, младший сержант С.Воинов дене пырля кредалмашке ушнен. Валерий йӱлышӧ машиныште шкет кодын. Марий салтак, йолташыже-влакым утараш манын, техникым огневой позиций гыч кораҥдаш тыршен, но... Шкеже утаралт кертын огыл. Пожарлан кӧра боевой установко йолташыже-шамыч ончылнак пудештын. Шукышт тудым эше илыше кодын манын ӱшаненыт, кум шагат наре кычалыныт, но муын огытыл. Патыр рвезе, шке илышыжым чаманыде, боевой йолташыже-влакым утарен.
1995 ий 1 декабрьыште специальный заданийым шуктымо годым патырлыкым, героизмым ончыктымыжлан колымыж деч вара Валерий Вячеславович Ивановлан Россий Федерацийын Геройжо лӱмым пуэныт.
Муро да строй дене ошкылмо конкурсышто икымше верыш Приволжский, кокымшыш Красноярский, кумшо верыш Пӧтъял кыдалаш школышто тунемше-шамыч лектыныт.
А шыжым Волжскысо тудын лӱмеш 2-шо №-ан школышто регион-влак кокласе «Ме патриот улына!» фестиваль эрта. Тушко Марий Эл, Татарстан республикла да Киров область гыч военно-патриотический клуб ден ушем-влакын участникышт чумыргат.
Е.Эшкинина.
Фотом Карай ден Пӧтъял кыдалаш школ-влакын архивышт гыч налме
Присоединяйтесь к ОК, чтобы подписаться на группу и комментировать публикации.
Комментарии 2