Ва ўсім свеце 21 лютага адзначаецца Дзень роднай мовы. Міжнародны дзень роднай мовы быў абвешчаны на 30-й сесіі ЮНЭСКА ў лістападзе 1999 і адзначаецца з 2000 года. Свята мае на мэце заахвочванне моўнай разнастайнасці і шматмоўнай адукацыі, а таксама спрыяе ўсведамленню моўных і культурных традыцый, якія грунтуюцца на ўзаемаразуменні, цярпімасці і дыялогу.
Дзень святкавання – 21 лютага – быў абраны таму, што ў гэты дзень у 1952 годзе загінулі пяць студэнтаў, якія змагаліся за наданне мове бангла статусу дзяржаўнай ў тагачасным Пакістане, усходняя частка якога пазней стала незалежнай дзяржавай Бангладэш.
Вучні ДУА “Ляснянская сярэдняя школа” Баранавіцкага раёна гэты дзень вырашылі правесці ў музеі “Замкавы комплекс “Мір”, дзе загадзя была заказана экскурсія на беларускай мове. Вучні рускамоўнай школы чуюць беларускую мову і размаўляюць на ёй, як правіла, толькі на ўроках беларускай мовы і літаратуры, таму зварот да формы экскурсіі ў такія мясціны з’яўляецца мэтазгодным, бо далучае вучняў да беларускага слова ў кантэксце духоўнага і сацыяльна-гістарычнага жыцця народа. Экскурсія дазваляе эмацыянальна адчуць сваю далучанасць да духоўнай спадчыны народа.
Мірскі замак – гэта тое месца, дзе ёсць пра што пагаварыць на беларускай мове. У 2000 годзе замак быў уключаны ў Спіс сусветнай спадчыны ЮНЭСКА. Гісторыя Мірскага замка звязана з гістарычным шляхам беларускага народа. Адметнасці архітэктуры замка, яго злітнасць з прыродай, ваенная гісторыя, абарончае дойлідства, культурная спадчына, прадметы дэкаратыўна-прыкладнога мастацтва мінулых стагоддзяў, партрэты ўладальнікаў замка, старадаўнія сукенкі і аксэсуары, кнігі, мэбля, посуд і іншае – пра ўсё гэта пачулі вучні з вуснаў экскурсавода.
Хлопчыкаў больш зацікавіла ваенная гісторыя. Засцерагальнае ўзбраенне літвінаў ХVІ – ХVІІ ст. прадстаўлена ў Рыцарскай зале. Асаблівую цікавасць вучняў у экспазіцыі выклікала дзіцячая паўдаспеха, якую прывучалі насіць 6-8-гадовага хлопчыка, навучаючы воінскаму майстэрству. З захапленнем разглядалі кінжалы, мушкеты, гарматныя ядры, а таксама паляўнічыя стрэльбы, размешчаныя разам з паляўнічымі трафеямі ў Паляўнічай зале.
Увагу дзяўчат, безумоўна, больш прыцягнулі сукенкі і аксэсуары, якімі ўпрыгожвалі сябе дамы мінулых стагоддзяў, рыхтуючыся да баляў.
Такога эмацыянальнага ўспрыняцця беларускага слова, беларускай гісторыі і культуры, якое атрымалі вучні Ляснянскай сярэдняй школы падчас гэтай экскурсіі, не зможа даць ні адно мерапрыемства ў межах школы.
Таццяна ХАРЫТОНАВА, настаўнік беларускай мовы і літаратуры ДУА “Ляснянская сярэдняя школа” Баранавіцкага раёна Брэсцкай вобласці
https://nashkraj.by/news/obshchestvo/baranovichskie-litseisty-zavoevali-devyat-diplomov-na-nauchno-prakticheskoy-konferentsii-v-sankt-pet/
https://nashkraj.by/news/kultura/finalistami-masshtabnogo-tantsevalnogo-konkursa-stali-kollektivy-iz-baranovichey/
https://nashkraj.by/news/obshchestvo/professiogrammy-master-klassy-interaktivy-kak-proshel-den-otkrytykh-dverey-v-baranovichskom-tekhnolo/
https://nashkraj.by/news/kaleydoskop/gimnazisty-iz-baranovichey-pokazali-blestyashchiy-rezultat-na-piterskoy-konferentsii-nasledniki-lomo/
https://nashkraj.by/news/kultura/ansambl-iz-baranovichey-predstavit-flag-shou-v-finale-oblastnogo-konkursa/
Присоединяйтесь к ОК, чтобы подписаться на группу и комментировать публикации.
Нет комментариев