МАҚСАДГА МАШАҚҚАТСИЗ ЕТИШ МУМКИНМИ?

Бир киши ўзига вашм (татуировка) чиздирмоқчи бўлди. Бу ишнинг устасига бориб: «Менинг баданимга сурат чизиб қўйсангиз, илтимос!», деди.
Вашмчи: «Марҳамат, қандай расм чизай?», деб сўради.
Киши: «Важоҳатли шер расмини чизинг, лекин аниқ ўхшасин!», деди.
Вашмчи: «Шернинг расмини қаерингизга чизай?», деб сўради.
У: «Елкамга», деди.
Вашмчи нинасини унинг елкасига ботирди. Шу заҳотиёқ киши додлаб юборди: «Эй жаноб, жонимни оғритдингиз-ку, қандай расм чизяпсиз ўзи?!».
Вашмчи: «Айтганингиздек шер тасвирини чизяпман», деди.
Киши: «Хўп, шернинг қаерини чизяпсиз?».
Вашмчи: «Думини», деди.
Киши: «Майли, думсиз бўла қолсин, мени ортиқ қийнаманг», деди.
Вашмчи унинг баданига яна нинасини ботирди, мижоз дод-фарёд солди: «Энди-чи, энди қаерини чизяпсиз?».
«Қулоғини!», деди уста.
«Қулоқсиз бўла қолсин. Жонимни оғритмай, ишингизни тезроқ битиринг», деди у.
Вашмчи қайтадан ишига киришган ҳам эдики, киши яна фарёд қилди: «Энди қаерини чизяпсиз?».
Вашмчи: «Қорнини».
Киши: «Жоним азобланаяпти, қорнини ҳам чизмай қўя қолинг», деди.
Вашмчи мижозидан ажабланиб, нинани улоқтирди ва: «Бундай ҳолга илк бор тушишим. Думсиз, қулоқсиз ва гавдасиз шерни ким кўрибди?!», деди.
Эй биродар! Мақсадинг йўлидаги қийинчиликларга сабр қил. Шунда ўзингнинг беодоб нафсинг хоҳишларидан қутиласан. Нафсини поклаган, кўнглида илоҳий ишқ туйғусини уйғотган, атрофини ойдинлатишни ўрганган киши Аллоҳнинг нури ила оламга боқади
#Mулохаза