Сёння 1 красавіка – дзень, калі можна жартаваць, смяяцца ці ўсміхацца. Таму мы выбралі вось такі мілы здымак для вас. На адваротным баку подпіс “Вадя и Макся – Верочке. 25 октября 93 г.”
Як вы думаеце, хто такі “Вадзя”?! Гэта ж Вадзім Багдановіч – старшы брат паэта. “Макся” – наш Максім, менавіта такое сямейнае прозвішча было ў яго. А “Верачка” – гэта стрыечная сястра, Вера Іванаўна Гапановіч, на год старэйшая за Вадзіма (з яе фотаздымкамі вас яшчэ пазнаёмім).
Стрыечныя браты і сёстры сябравалі, пісалі лісты, дарылі адзін аднаму фатаграфіі. Спачатку гэта рабілі бацькі, а потым і самі. Сямігадовы Вадзім пісаў сястры Веры з Ніжняга Ноўгарада: “Дорогая Вера. Как я уезжал, то мне стало жаль уезжать от вас, мне хотелось еще немного погостить у вас, но и хотелось Макса и Леву увидить. Кланяйся бабушке, Анюте, тете Саше, Полёне, Магдалине, Пете, Нюте, Наталке. Спасибо за письмо и карточку».
Фатаграфаваліся хлопчыкі ў Гродна, у атэлье “Садоўскага і Казлоўскага”. Здымак пастановачны, яны зняты на лясным фоне, каля пня. Калі прыгледзецца можна ўбачыць, што Вадзім трымае ў руцэ птушку. Наш Максім выглядае як дзяўчынка, бо апрануты ў сукенку (ці даўгую кашульку). У яго руцэ – кошык з кветкамі.
Мілата! Усміхніцеся!
Присоединяйтесь к ОК, чтобы подписаться на группу и комментировать публикации.
Нет комментариев