Сэр унтан-морт унтан и ики ус, хуӆам эви таяс. Хот оваӆ иса лап тухарман тайсаӆӆы. И пуш ун эвеӆ пеӆа ястаӆ:
– Эвийе, иса щи потӆаям. Овас Вот ики хоща яӊха, ӆор па пелка. Шеӊк ант ат поӆаӆ. Тув па пелка ант ёхаттэн унты, сах киӊанӆан лап аӆ яраӆан, вай ювалӆан па аӆ яраӆан. Мойпарат ки ещаӆ уятӆан – мосаӆтаӆан, апаӆмаӆан па еӆӆы мана. Хота ёхатӆан, кат ӆаям уятӆан, пасты ӆаймен аӆ кетми, няши ӆаймен вуя. Щаӆта наӊ ванта, муй еӆӆы верты.
Ин ики ун эви юшаӆ щи понтсаӆӆы. Тув кимӆа ёхтас па потты питса, сах киӊанӆаӆ лап ярсаӆӆы, вай ювалӆаӆ па ярсаӆӆы: «Муя па ма потты питӆаям, киӊанӆам лап ярӆаӆӆам, вай ювалӆам па ярӆаӆӆам». Тув па пелка ёхтас, мойпарат еӆ воштасӆы па еӆӆы шушмас.
Хув манас, ван манас, хот пуӊӆа ёхтас. Няр наӊк юх эӆты хот омасаӆ. Сара хотан ӆув кат ӆаям уйтас, итаӆ пасты, кимет па няши. Пасты ӆаймаӆ вус па юх сэврас, кураӆ нох аӆсаӆӆы. Хот хар ёваӆтаӆ эӆты кураӊ вой нёхи пул па нёхас нёхи пул уйтас, ёхи ӆэвемасӆы. Етная щи йис. Хотаӊ куща ёхтас, антап кеӆаӆ хоща щи арат нёхас тахармаӆ. Имеӆ эӆты ӆэщтан инщасас. Эвеӆ инщассаӆӆы, ӆэщтанаӆ ант вантсаӆӆы.
Нёхас воят ӆэщатты питсатан. Эви йи нёхас сох вертаӆ эӆты, ин ики войӆаӆ иса нох ӆэщатсаӆӆы.
Нёхас нёхи кавартсатан. Ин ики нёхи кат ана понтсаӆӆы, йи анаӆ вус па ястаӆ:
– Там анэн пуӊаӆ хота туви.
Ин эви ким этас, юх кутан щи шушаӆ, ван хотаӆ па ант уятсаӆӆы. Икеӆ пиӆан нёхас нёхи ӆэты питсатан. Ин ики йи пул ӆэтаӆ эӆты, ин щи эви таӆаӊ нёхи ан иса ёхи ӆэсӆы.
Кимет хатӆа йис. Ин ики унта манты питас па ястаӆ:
– Ма ёхаттэм унты нёхас сох эӆты манэм моӆщаӊ ёнта, ант ки ёнтӆан, моӆты вера питӆан.
Ин ики унта щи манас. Эви нумасаӆ: «Щикем кут сысан муй ма верты кум шитӆам?». Аям верас па нёхас сохат аямна утщияӆ яха ханаӆты. Щи кутан йи ими хота ӆоӊас па ястаӆ:
– Охем ванты.
– Кум ант шитӆам, охен вантты, – ин эви ястас.
Ими щиты щи хотаӆ пеӆа манас. Ин эви вусӆы па щи нёхас сохат яха аяман аямсаӆӆы. Етна пелка ин ики ёхӆы ёхтас. Ялап нёхас моӆщаӊаӆ нох ӆуматсаӆӆы, хот ов пуӊӆа туп шушмас, моӆщаӊ лэӊкеӆ аӆ рохнемтас. Ин ики ликащас па ин эви паратсаӆӆы.
Хуӆам эви тайты ики хотаӆ шеӊк такан потты питса. «Ун эвем ма ясаӊӆама, аӆпа, ант хуӆантас», – ин ики щиты нумасаӆ.
Ин ики кутап эвеӆ Овас Вот хоща китсаӆӆы. Кутап эви ищи ащеӆ ясӊата ант хуӆантас.
Щаӆта ин ики ай эвеӆ Овас Вот хоща китсаӆӆы. Йи пуш па эвеӆа япсыя потартас па партас. Щаӆта эви юшаӆ щи понтсаӆӆы. Туваӆ туп хащас, эви сах киӊанӆаӆ лап ярсаӆӆы, вай ювалӆаӆ па ярсаӆӆы. Мойпарат пиӆан уйтантас па ӆувиӆаӆ мосаӆтасӆы, апаӆмасӆы па еӆӆы шушмас. Сара хотан ӆаям уйтас, йи ӆаймаӆ пасты, кимет па няши. Няши ӆаям вус, юх сэврас, кураӆ нох аӆсаӆӆы. Хот хар ёваӆтаӆ эӆты кураӊ вой нёхи пул па нёхас нёха пул уйтас па ишни хомпа понтсаӆӆы.
Етна пелка хотаӊ ики ёхи ёхтас, антап кеӆаӆан щи арат нёхас тахармаӆ. Ин эви нёхасӆаӆ вусӆы па сора ӆэщатсаӆӆы. Ин икина инщасӆа: «ӆэщтанэм ант вантсэн?»
Эви кураӊ вой нёхи пул па нёхас нёхи пул икеӆа тус. Щит щи ӆэщтан уӆмаӆ.
Нёхас нёхи нох кавартсаӆан, ин ики ястаӆ:
– Пуӊаӆ хота там нёхи туви.
Эви нёхи анаӆ пуӊаӆ хота тусӆы. Щаӆта ин ики пиӆан ӆэты омассатан. Эви йи пул ӆэтаӆ эӆты, ин ики нёхи ан иса ёхи ӆавемасӆы.
Кимет хатаӆан ин ики па щи унта актащты питас, эвия ястаӆ:
– Ма ёхаттэм унты там нёхас воят эӆты манэм молщаӊ ёнта.
Ин эви ёӆан хащас па нумасаӆ: «Щикем кут сысан муй ма верты кум шитӆам?». Щаӆта хота йи ими ӆоӊаӆ па ястаӆ:
– Мение, охем ванты.
Ин эвина щи пиращ ими ох вантты питса. Вантаӆ, йи паӆаӆан имет вой сох татаӆӆат, кимет паӆан па моӆщаӊ ёнтӆат. Щиты ин ими охаӆ ванттаӆ эӆты моӆшаӊаӆ щи ёнтса. Эвет щи каркама рупитсат.
Ин ики иӆана унт эӆты ёхтас. Моӆщаӊаӆ нох ӆуматсаӆӆы, хотаӆ хуват шушемияӆ па моӆщаӊаӆ ишкащӆаӆӆы. Щиты щи пиращ ики эви Овас Вот ики пиӆан уӆты питсатан. Эвеӆ ащи хотаӆ хошма щи йис.
Любовь Возелова ӆэщатсаӆӆы
Надежда Конева монщиӆыйс
Нет комментариев