Ӆон верты ими

Йи охалят ур хот Паӆвос хощаңна ӆоймаӆ. Ӆув опращеӆ – Сайнаховат. Велащ вуям ның щи хотна уӆмаӆ. Щикем ямас ёнтастаӆ. Мохиӆаӆ воямты юпина ӆон верты питтаӆ. Хаӆэват, аӆаңсахат, па ёнтасты мосӆ, ар ӆон вертаӆ.
Щитна аттый ӆон вертаӆ. Унтпаӆ ими ӆув пеӆайӆ ивейна лавиӆытаӆ: «Эвие, аттыйи ӆон верты ант рахаӆ. Катра нэңхет лавиӆысат, иӆайна ищи ӆон верты ант рахаӆ. Мохиӆув аса воямсаят». Энамты ның унтпаӆ пеӆа лавас: «Есса верты хащас, наң щутща, ма еса уӆ па иӆ хуйӆам». Унтпаӆ воямса, энамты ның хоӆна ӆон вераӆ.
Имосайна ув понат ропатсат, ув пелак пунсантас, пуращ ими ёхи ӆоңас. Сахаӆ ранякең, хоӆта тохам тахайӆаӆ щиты иӆан ранесӆат. Упатӆаӆ нохащ пунраммеӆ, хуван ант кунсыӆыямат. Сэв ранякиӆаӆ хощ пулпаммеӆ.
Ёхи ӆоңас, мень пеӆа лавас: «Хиӆыйи, яха ӆон верӆаман». Энамты мень сэңк паӆтамас, оӆаңна нёхӆаты хоӆна ант веритас, щаӆта аяӆта яммисак йис. Ӆон верты ими амп ӆон вераӆ. Ӆув патарох ан таймаӆ, ӆыпеӆна амп вой. Ёсӆ вой хоща куркитаӆ, щи юпина ӆон вераӆ. Энамты ның, кур аӆты ропахна, нох ӆояӆ. Тут аӆэмаӆ, ким аңкармаӆ. Нампры пай хоща тут ласкаӆ. Нампры пай нох вущемаӆа. Энамты ның еӆ уваӆтаӆ: «Няврэмӆан хотэӆ нох вущитмеӆ!» Иттам Ӆон верты ими нох ӆоямтас, кимащ аӆ китӆа. Патарох анаӆ ярэмамаӆ вуты.