Предыдущая публикация
ХОРАЗ БУСАНГ ХОРАЗ БОЛ
Адатын этип хораз, танг къатгъынча къыччыра
Сесинден ялкъып есси, ону судгъа чакъыра.
Сен - дей, - дагъы къыччырсанг, мен сени сояжакъман,
Тютюп, отда чиркитип, къазанга салажакъман.
-Англадынгму? - Англадым. Башым гьаран сакъладым
Шондан сонг бери багъып, къанат сама къакъмадым.
Нетедей, къыччырмасам, дагъы ёкъму хоразлар,
Къойлар, итлер, бабишлер, гюргюрглер булан къазлар?
Олар къыччыра турсун, мен иннемей турайым,
Тавукълар булан арив аралыкълар къурайым.
Къурса къурсун, нетерсен, есси геле уягъа
Асси болуп, къабунуп, ондан чыкъан гьуягъа
-Сен нетесен тавукъ баш? Не ишинг бар хорлама,
Мени тавукъларымы гьаванг учун къоллама?
Тынгла! Айта бараман - дагъы бу иш болмасын,
Тавукъланы уясы гьуялагъа толмасын!
-Англадынгму? - Англадым. Дагъы ёкъманолагъа
Тербенмей, аваз бермей, ошарман таш холагъа.
Заман гетип арадан, къайгъы геле уягъа,
Гечени ортасында есси ярыкъны ягъа.
Къуймур къуймур тавукълар тёрге минип олтургъан
Кукай хоразны башын, чычып покъгъа толтургъан.
Мююш мююшге барып есси тюнтюп айлана,
Юмуртгъа табуп болмай ант негетге байлана.
Сен къара чы, хораз! - дей. Валлагьи, антым бар - дей
Юмуртгъа къозламасанг, къутулмакъ ёкъ сагъа - дей.
Энниги оьзюнг къара, эртен гелирмен къайтып
Не юмуртгъа, не башынг - деп, есси гетди айтып.
Хораз дёндю къайгъыгъа, иши бузукъ, чара ёкъ
Мекенли бир зат - есси, гелегени эртенокъ.
Муна болду адаршай мени къызыл песиме,
Шулай болуп къалар деп, гелмей эди эсиме.
Адаршай болсун магъа, къакъмагъангъа къанатым,
Шо гюн союлгъан бусам, къалажакъ эди атым.
Тавуш ёкъ, юмуртгъа ёкъ. Танг къатды. Эртен болду,
Хоразны кечел башы, къызыл ренкине толду.
Хоразчы хораз эди, татли болур шорпасы
Тапталгъан оьзденликни не зат болур багьасы?
Бир энкей, эки энкей, ят къурсакъдан, сюйкел дей,
Бир токътавсуз, гётлеклер, онда бар, мунда гел дей.
Адилсизлик заманда шолай боладыр ишлер.
Дуньяны елеп къойгъан, къагьбалар булан пичлер.
Айтагъаным, оьзденим, ер этмегин атынгны.
Бир инсан болмас сени, алмагъа фирсатынгны.
Чыгъар сесинг, яшырма, атынг къалсын эллерде,
Тюзню сёйлеп, гьакъны ал, болурсанг уьтгенлерден.
Халкъ! Таман чорайгъанынг, белингни яз, тур эре
Ессибиз оьзден халкъгъа уллу умутлар бере.
Автор: Ибрахим Махтибекли, 2016г.
#Къумукъланы_шиърулары #Айтывлар_ва_аталар_сёзлери
Следующая публикация
Нет комментариев