Константин Петрович доно куштылгы атлетика доно школышты уроквлӓм пумы, школын чемпионатым эртӓрӹмӹ гишӓнӓт попышна. Тиштӹ инициативӹм физкультурым тымдышывлӓ, Кырык мары физкультура дон спортцентрӹн тренервлӓ анжыктен кердӹт. Молнам спорт мастерӹш кандидат, тренер Юрий Федоткин кроссменвлӓжӹм Суасламарыш, Йошкар-Олашкат шыпшедӹлӹн. Тене кырык марын сӓмӹрӹк легкоатлетвлӓм командыш поген ӹш кердеп, Мары Элӹн чемпионатыш иктӹмӓт нӓнгетелыт. Но пӓлемдем: Шавашарын олимпийский резервӹн училищӹштӹ тыменьшӹ кырык марынвлӓ – Виктория Таланцева, Артем Шевелев Суасламары Республика верц Приволжский федеральный округын чемпионатышты 2-4-шӹ июньын иктӹжӹ 5000 м, весӹжӹ 1500 м дистанциштӹ кыргыжевӹ. Нинӹ йӓл лошты пачеш кодевӹ. А теве Мары Элӹн тренер, районнан Латансолаэш шачшы Константин Лукьяновын воспитанниквлӓжӹ сӹнгӹмӓш шоэвӹ: Андрей Мошкин 3000 м препятствивлӓ гач кыргыжмашты 9 мин. 12 секунд веремӓ доно 20 иӓш яктешӹвлӓ лошты икшӹ вӓрӹм нӓльӹ; Егор Кузнецов – 800 м кытышты кокшы призер ли (1 мин. 52,8 секунд); 5000 м когораквлӓ лошты финишӹш кымшеш Ольга Пряткина пырыш – тӹдӹ тене Кисловодскышты эртӹшӹ кроссышты мадын нӓлӹн.
Константин Петрович Звенигово районын Исменцӓ солан Кирилл Семеновым УОР гач юниорвлӓ лошты Российӹн чемпион якте куштен. Ти сӹнгӹмӓш тӹдӹ 800 м дистанциштӹ 1 мин. 49 секунд веремӓ доно шон. Тидӹ гишӓн мӹнь «Легкая атлетика» лӹмӓн всероссийский журналыштат лыдынам.
Тренер К.П. Лукьянов келесӹш: «Кого сӹнгӹмӓш шоаш легкоатлетвлӓн природын талант дӓ научный йӧн доно тренируялтмаш веле палша. Мастар пӹсӹ ӹдӹр-ӹрвезӹвлӓжӹм школвлӓштӹ, спортшколвлӓштӹ 10-12 иӓш гӹцок чемпион лиӓш йӓмдӹлӹмӹлӓ».
Талантан спортсменвлӓжӹм физкультура урокыштат цаклаш лиэш. Паратмар школышты тымдымем годым Вениамин Микряковым пӹсӹ спринтер, мастар футболист семӹнь ужынам. Седӹндон вел тӹдӹ школын дӓ «Сила» свохозын командышты пӹсӹ нападающий лин кердӹн, 100 м 11 секундыштат кыргыж эртен. Вениамин Филимонович, институтым тымень лӓктӹн, шукы и Пӹзӹкныр школышты тетявлӓм тымден, районнан легкоатлет-чемпионвлӓм куштен. Тӹдӹ физкультура урокым методика семӹнь шӱм вашт виден, седӹндон тымдымы тетявлӓжӹ логӹц пӹсӹ кыргыжшывлӓ, ечӹзӹвлӓ лӓктӹнӹт. Нӹнӹ сӹнгӹмӓш Суасламарыштат шоныт.
Кӹзӹт Мары Эл Республика образованин заслуженный работникшӹ В.Ф. Микряков кӓнӹмӓштӹ ылеш, эртӹшӹ пӓшӓ жепшӹм ӓштен, когоэшнен кердеш.
А мӓ эче кырык марын заслуженный тренер К.П. Лукьяновым макталтенӓ. Изинек Ямангаш школышток тӹдӹ хоккейлӓ мадын, кыргыжталын, Йыл мыч пыш доно каштын, вешлӓ доно ыдырен, цаткыдемӹн. Горьковский речной училищӹн чемпион ечӹ доно кемӓштӹ лин. Тӹштӹ «гребля на ялах» спорт доно занимаялтын, шӹмӹтӹн пышым виденӹт. Ямангашын речник Константин Лукьянов спортын ти вид доно Горьковский областьын сборный команда верц выступаен, зональный тӓнгӓшӹмӓштӹ икшӹ вӓрӹм нӓлӹнӹт.
Кужы кӓпӓн Константин тенге общефизически цаткыдемӹн, тидӹ тӹдӹлӓн марафоным кыргыжаш вим пуэн. Пакыла тӹдӹ шаям тенге ушыш: «Ӓрня мычкы кечӹ йӹде тренировкыш лӓктӹнӓм, ирок 12 уштышым эртенӓм, вадеш – 15 километрӹм, кукшыгечӹ дон рушӓрнян – 30-35 уштыш рӓдӹ, эче скоростной качествым лӱктӓш пӹсӹн икпоратка дистанцивлӓм кыргыжталынам, упражненивлӓм ӹштенӓм, РСФСР профсоюзный сборный команда верц кыргыжталмем годым спортивный сборвлӓш кандыштыныт». Кӹзӹт тренер ӹнде тенге легкоатлетвлӓм, кроссменвлӓм ӹшке йӓмдӹлӓ.
42 км 195 м дистанциштӹ 28 иӓш Константин Лукьянов спорт мастерӹн нормым 2 цӓш 20 мин. 15 секунд веремӓ доно темен, сек яжо результатшы – 2 цӓш 19 минут. Тӹдӹ пыт Сарапай солан тренер Игорь Петров видӹмӹ доно тренируялтын, кырык марынвлӓм Европын аренӹштӓт лӹмлештӓрен – 1993-шы ин Румынин Бухарест халашты эртӹшӹ интернациональный марафонышты кокшы вӓрӹм нӓлӹн. Вес ин Санкт-Петербургышты международныйышты кымшы призер лин.
Марафоным кыргыжаш… ой-ой-ой маняр ви, тырхымаш келеш! 5-10 уштышвлӓм эртӓшӓт куштылгы агыл, дистанциштӹ тактикӹм кычен мыштымыла, скорость келеш. Шавашарын «Олимпийский» стадионышты тене кокшы июньын техень ылмыштым ПФО-н сӹнгӹшӹ Андрей Мошкин, кымшы призер Ольга Пряткина, кокшы вӓрӹм нӓлшӹ Егор Кузнецов – тренер Константин Лукьяновын воспитанниквлӓжӓт анжыктевӹ. Нӹнӹ тӹдӹм сусуэмдевӹ, тренер пӓшӓм пакыла видӓш кымылангдевӹ. А мӹнь кидшӹм кормежтен, у сӹнгӹмӓшвлӓм согоньлышым.
Коктын ик семӹнь иктешлӹшнӓ: районнан школвлӓн кроссменвлӓ лоштат талантвлӓ пӓлдӹрнӓт. Кӱ шана, тӹдӹм легкоатлетӹн корныш ажед пырташ лиэш. Мастар легкоатлетвлӓм тыменьшӹвлӓ дӓ сӓмӹрӹквлӓ лошты эртӓрӹмӹ школвлӓн, районнан и йӹдеӓш чемпионвлӓштӹ айыраш лиэш. Спортын 20 видӓн куштылгы атлетика цилӓ йиш спортсменӹм пӓлемден кердеш. Константин Лукьянов доно эче вес ик шанымаш шона: кырык марын легкоатлетвлӓм районнам лӹмлештӓрӓш Мары Элӹн чемпионатыш дӓ РМЭ-н кубок верц кредӓлӓш со нӓнгемӹлӓ.
/И. ЛОБАНОВ, легкоатлет-ветеранвлӓ лоштышы Европын кок пачаш той призер, Российӹн чемпион. «Жерӓ» №23 (10849), 16 июнь 2023 ин/
Нет комментариев