Калі надыходзіць красавік, каляндар напамінае нам аб адной з самых страшных тэхнагенных катастроф чалавецтва. Страхаў з кожным годам становіцца ўсё менш, але гаварыць пра гэта трэба, каб гісторыя не паўтарылася і каб раздзяліць боль і смутак тых, каму давялося пакінуць свае родныя мясціны, пасыпаныя попелам Чарнобыля.
Памяць вёсак вісіць над пагостамі –
Памяць родных і памяць гадоў.
Боль і горыч чарнобыльскай ростані –
Яны ў сэрцах маіх землякоў.
“Чарнобыль – мой смутак і боль”, - на такую тэму народным аматарскім літаратурным калектывам “Світанак” Краснапольскага РЦК падрыхтавана выстаўка. На выстаўцы прадстаўлена выдавецкая прадукцыя па творчасці членаў “Світанка” – буклеты і брашуры з вершамі, сцэнарныя распрацоўкі і ілюстрацыі па тэме, лістоўкі з асобнымі вершаванымі тэкстамі і інш.
Выстаўка працуе з 15 па 27 красавіка ў Краснапольскім РЦК.
Яна прызначана як для спецыялістаў клубных устаноў для выкарыстання матэрыялаў у рабоце, так і для асоб, зацікаўленых у атрыманні дакументальнай інфармацыі і мастацкай літаратуры па чарнобыльскай тэматыцы. У кранаючых душу вершах – настальгічны ўспамін пра родныя вёскі, боль і смутак па роднай пакутнай зямлі, па якой шчодрай жменяй рассыпан і стронцый, і цэзій. У вершах – і надзея, што жыццё на забруджаных тэрыторыях будзе працягвацца.
Ёсць у сэрцы надзея,
Ты ўваскрэснеш, наш край,
І замест пустазелля
Прыйдзе ў квецені май.
На вяртанне тэрыторый для нармальнага жыцця нацэлена дзяржаўная палітыка Беларусі. Сёння ў краіне рэалізуецца шостая дзяржаўная праграма па пераадольванню наступстваў катастрофы на Чарнобыльскай АЭС на 2021 – 2025 гады.
Працягвае развівацца і Краснапольскі раён: ідзе будоўля жылых многакватэрных дамоў, адбываецца газіфікацыя аграгарадкоў, рэканструкцыя ліній электраперадач, вядуцца дарожныя работы, надаецца ўвага сацыяльнай сферы, уводзяцца ў эксплуатацыю новыя землі.
Мы шчасця кожнаму жадаем,
Красы жыцця – на добры лёс,
І каб заўжды над родным краем
Чысцюткім быў блакіт нябёс.
ВАЛЯНЦІНА МАРЧАНКА, кіраўнік калектыву “Світанак”
Присоединяйтесь к ОК, чтобы подписаться на группу и комментировать публикации.
Нет комментариев