“З любоўю да людзей і вёскі”, - менавіта так можна ахарактарызаваць характар творчай вандроўкі, якая адбылася па вёсках Ячная Буда, Раманькі, Глыбаў, Буглаі Краснапольскага раёна.
Для жыхароў гэтых вёсак 9 красавіка была прапанавана канцэртная праграма, у якой прынялі ўдзел ансамбль народнай песні “Спадчына” (кіраўнік Л. Я. Каратцова) Пачапоўскага СДК, кіраўнік і салістка народнага ансамбля народнай песні “Шчадрэц” А. А. Трафімава, саліст Краснапольскага РЦК К. У. Чалпанаў, кіраўнік народнага аматарскага літаратурнага калектыву “Світанак” В. А. Марчанка.
У праграме гучалі песні і вершы аб малой радзіме, дарагіх сэрцу вёсачках, аб роднай Беларусі, аб вясне і лепшых чалавечых пачуццях.
Выступленні артыстаў знаходзілі шчыры водгук у сэрцах вяскоўцаў – адны з іх падпявалі ці падтанцоўвалі, другія не хавалі слёз, расчуленыя ўспамінамі і ўвагай да іх.
Пералічаныя вёскі - з тых, якія называюць аддаленымі ці маланаселенымі. Яно так – колькасць жыхароў у кожнай з іх 5-10 чалавек. Канешне, іх жыхароў хочацца надзяліць увагай, аблашчыць добрым словам, сагрэць песняй.
Асаблівасцю гэтай вандроўкі з’явілася тое, што некаторыя з артыстаў пабывалі на сваёй малой радзіме. Людміла Каратцова, Наталля Дударава і Ніна Яцутка, члены ансамбля “Спадчына”, пражывалі ў вёсцы Буглаі, а Алена Трафімава – у вёсцы Казелле, што побач з Ячнай Будай і Раманькамі.
“Вось тут стаяла мая хата, а гэта дрэвы, што раслі ў маім садзе”, - усхвалявана дзеліцца Ніна Яцутка.
Жыхары вёсак цёпла, як гэта заўсёды вадзілася і водзіцца сярод вяскоўцаў віталі сваіх землякоў, а тыя аддана і шчыра адказвалі ім сваімі песнямі і добрымі словамі. Вельмі цёпла яны выказваліся ў адрас ансамбля “Спадчына”, які часта наведвае гэтыя вёскі, і творчасць якога задавальняе густы вяскоўцаў.
Такія вандроўкі і сустрэчы - да сэрца і артыстам, і жыхарам. Уражанні ад вясковых пейзажаў і краявідаў – цудоўныя і натхняльныя. Менавіта яны натхняюць на творчасць і занатоўваюцца ў паэтычныя радкі мясцовай паэткай В. Марчанка. Уражваюць і самі жыхары, у большасці якіх за плячыма гады і гады жыцця. У Ячнай Будзе, напрыклад, давялося сустрэцца з сямейнай парай, кожнаму з якой жыццё адмерыла ўжо больш за 90 гадоў.
Творчую групу падзякавала старшыня Мхініцкага сельскага Савета дэпутатаў В. У. Шапавалава. А загадчыца метадычнага аддзела РЦК В. У. Юркіна зрабіла цудоўныя фотаздымкі, якімі хочацца падзяліцца з вамі, паважаныя чытачы і наведвальнікі нашай групы на сайце “Аднакласнікі”.
Вёска – дзівосная планета, дзе жылі і жывуць прыгожыя і цудоўныя людзі, які заслужылі і заслугоўваюць нашай увагі і павагі.
ВАЛЯНЦІНА МАРЧАНКА
Присоединяйтесь к ОК, чтобы подписаться на группу и комментировать публикации.
Нет комментариев