Кагорта камбайнераў-тысячнікаў на сёлетнім жніве папоўнілася яшчэ двума перадавымі механізатарамі.

Імі сталі хлебаробы ААТ «Княж» Аляксандр Мацкевіч і ААТ «Агратэхсэрвіс» Андрэй Корсак.
Для Аляксандра сёлетняе жніво з’яўляецца трыццаць трэцім па ліку. Летась на палеткі ён вывеў свой новы камбайн «Палессе» КЗС-1218. Тады механізатару не пашчасціла пераадолець тысячны рубеж па намалочаных тонах, бо ураджайнасць зерневых была невялікая. Сёлета ўдача ўсміхнулася Аляксандру — напрыканцы мінулага тыдня ён адправіў у дзяржаўныя засекі доўгачаканую 1000 тон зерня ўраджаю 2025 года.
Са знакавай падзеяй камбайнера павіншавалі і ўручылі мноства падарункаў старшыня райкама прафсаюза работнікаў АПК Аляксандр Гернат, намеснік дырэктара ААТ «Княж» Міхаіл Якімовіч і старшыня пярвічнай прафсаюзнай арганізацыі сельгаспрадпрыемства Таццяна Бохан.
У суседняй гаспадарцы ААТ «Агратэхсэрвіс» таксама з’явіўся чарговы камбайнер-тысячнік — Андрэй Корсак. Механізатар сёлетняе жніво пачынаў на камбайне «Палессе» КЗС-1218, які эксплуатаваўся 16 сезонаў. За гэты час тэхніка выпрацавала свой рэсурс. У пачатку жніўня сельгаспрадпрыемства набыло два новыя камбайны, адзін з якіх кіраўніцтва гаспадаркі даверыла Андрэю. На сучасным мадэрнізаваным агрэгаце айчыннай вытворчасці мужчына дамалаціў тысячу тон зерня, пачатую на старым камбайне.
У адзін з працоўных дзён Андрэй Корсак прымаў віншаванні з працоўнай перамогай. Камбайнера павіншавалі старшыня райкама прафсаюза работнікаў АПК Аляксандр Гернат, дырэктар ААТ «Агратэхсэрвіс» Міхаіл Кавалёнак і кіраўнік пярвічнай прафсаюзнай арганізацыі сельгаспрадпрыемства Яся Краснікава.
На сёлетняй ўборачнай кампаніі Шаркаўшчынскага раёна рубеж у тысячу тон намалочанага і перавезенага зерня перасягнулі чатыры камбайнеры і чатыры вадзіцелі. Гэта дастойны вынік.