Механізатар адкрытага акцыянернага таварыства «Даватарскі» Аляксандр Буйка (на здымку) працуе на энерганасычаным трактары «Кіравец» К-744.

За мужчынам замацаваны «сталёвы конь» айчыннай вытворчасці «Беларус» МТЗ-82, але калі прыходзіць час веснавога ворыва або ўзняцця зябліва восенню, Аляксандр перасаджваецца за руль санкт-пецярбургскага асілка палёў.
— У гаспадарцы не хапае механізатарскіх кадраў, таму за многамі трактарыстамі замацаваны па дзве адзінкі тэхнікі, — кажа мужчына. — У час нарыхтоўкі кармоў перавозіў здрабнёную правяленую масу з поля ў сянажныя траншэі. Са жніўня займаюся ворывам, рыхтую зямлю пад сяўбу азімых культур. Плошчы ў гаспадарцы вялікія, таму працуем без выхадных, каб своечасова выканаць цыкл неабходных работ. Трактар, на якім я задзейнічаны, эксплуатуецца восьмы сезон. Зразумела, што часта здараюцца паломкі, бо пад плугі трапляе каменне і наогул землі ў нашай гаспадарцы цяжкія, сугліністыя, патрабуюць глыбокай апрацоўкі. Нягледзячы на гэта, усе мы, механізатары, зацікаўлены ў станоўчых выніках.