✒ Ня̄п пуӈк лаим ке̄рас (мо̄йт)

Пе̄с порат ӯс ӯнлыс. Нэ̄матыр утыл йинэ хо̄нт ювле ат паты. Ты ӯс ке̄рас пуӈкыт нумын ӯнлыс. Коны-па̄лыл ос осыӈ йӣвыӈ ка̄ртал ва̄рим о̄лыс. То̄на ты йинэ ня̄лыӈ хо̄нт, ё̄втыӈ хо̄нт кӣвырн патуӈкве ат ве̄рмыс.
Аквматэ̄рт о̄с акв хо̄нт ёхтыс. Ёхтыс, кӣвырн патуӈкве ат ве̄рми. Ке̄рас паттат та о̄лэ̄гыт (хо̄нт ма̄хум). Ла̄ще̄гыт, э̄рыӈ ка̄рта а̄ви па̄лыг-виве. Аквнакт но̄х-ха̄ӈхуӈкве патсыт. Но̄х кос ха̄хсыт, ӯс ка̄рта мос ат ёхтысыт.
Ӯсыӈ ма̄хум ме̄сгыӈ ква̄лгыл нэ̄гим норыт акван-ва̄рсаныл. Хо̄нтыт но̄х-ха̄ӈхуӈкве патсыт, ме̄сгыӈ ква̄лыг кит о̄вылныл супыг-са̄грапавес. Норыт ёлаль та поварасыт, ань хо̄нт ма̄хум та сакватаве̄сыт.
Хультум хумияныл о̄с о̄лэ̄гыт, сысы ат минэ̄гыт. Ӯс кӣвырн патуӈкве о̄с кос а̄рталахтэ̄гыт, ат ве̄рмысыт.
Аквматэ̄рт тэ̄та̄л холуӈкве патсыт. Тувыл ӯсныл тэ̄нут во̄ве̄гыт. Ӯсыӈ ма̄хум ня̄п пуӈк висаныл, па̄ӈкыл янытэ̄тыл сартлыгтасаныл, ёла та ще̄лтумтасаныл. Такос па̄ӈкыл сартым о̄лыс, хо̄нтытн та та̄йвес. Тувыл ос хо̄нтыт сысы та минасыт.
Та ва̄рмаль юи-па̄лт ке̄рас «Ня̄п пуӈк лаим ке̄расыг» ла̄ваве.
И.Я. Чернецова
#ЛуимаСэрипос #статьиОРНГ #ТекстНаМансийском