✒ На̄лок-олн ойтуӈкве ялэ̄н

Югравт мирныл на̄лок-олн атнэ ма̄т рӯпитан кӯщай нэ̄ Ольга Литова ля̄ххал тотнэ колн ёхталас. Тав ма̄хум ма̄гыс хӯлтнэ ла̄тыӈ ке̄тыс. Ка̄сыӈ та̄л э̄лумхо̄лас такви нупылэ хансум колэ, ма̄шинатэ ма̄гыс ос рӯпататэ̄ныл олн вос ойты. Ань ты та̄л э̄рнэ нэ̄пакыт маныр ма̄гыс ос хунь миӈкве э̄ре̄гыт, тав ты урыл потыртас.
Мо̄лты та̄л рӯпатаныл коныпал мо̄т ма̄т олн сэ̄лум хо̄тпат яныгпо̄ль э̄тпос оигпан мус декларация-нэ̄пакт хасхатуӈкве ла̄вве̄сыт. Ты ва̄рмаль та̄л котиль э̄тпосныл о̄вылтахтыс. О̄йттур э̄тпос мус ма̄хумн янытэ̄т ойтхатуӈкве э̄ри. Хо̄т ос манса̄вит олн сэ̄лсын, тыима̄гыс нэ̄паканын о̄лнэ ма̄нынт мае̄н.
Ка̄сыӈ хо̄тпа рӯпататэ̄т олныл ойтаве. Тот кӯщаит на̄н сэ̄лум олнаныныл акв ма̄нь охсатэ ты 13% та̄ра бюджетын ойтэ̄гыт. Ты хосыт округувт са̄всыр тэ̄лат мӯсхал щирыл щё̄питавет.
Маныр ма̄гыс ойтхатуӈкве э̄ри
Щар о̄влэ̄т тамле ва̄рмаль ма̄гыс олн атаве. Хо̄тпа такви матыр рӯпата ва̄ри ке, тыима̄гыс таве̄н ойтхатуӈкве ты э̄ри. Тувыл китыт тэ̄ла, э̄лумхо̄лас колэ манос ма̄шинатэ тыналаме хосыт олн сэ̄лыс ке, тав о̄с ойтхатуӈкве ла̄ваве.
Хо̄тпа тыналан колэ ос ма̄шинатэ хӯрум та̄л иӈ ат ке о̄ньщистэ, таве̄ныл на̄лок-олн пуваве. Ос тыгыл арыгнув та̄л о̄щсанэ ке, тав декларация-нэ̄пак хансуӈкве ос ойтхатуӈкве арыгтаптаве.
Хӯрмит ва̄рмаль щирыл, хо̄тпа мо̄т хо̄н ма̄ныл матыр рӯпата ма̄гыс олн сэ̄лыс ке, тыима̄гыс о̄с олнпот ойтуӈкве ла̄ваве. Армият лусытан манос рӯпататэ хосыт мо̄т хо̄н ма̄н ке̄тыгла̄лнэ хо̄тпат тув ат патэ̄гыт.
Нилыт ва̄рмаль щирыл, э̄лумхо̄лас лотерейный билетыл ёнгиматэ матыр олн ликмалтан порат о̄с ойтхатуӈкве я̄ртаве. Ёнгим са̄в олн винэ порат, тувыл та̄ра олн пуваве.
Ос 15 со̄тыра солко̄ви мус сэ̄лсын ке, то̄нт на̄нки ойтхатуӈкве ла̄ваве̄н. Тувыл ос по̄х хо̄тпаныл хотты мӯйлупса винэ̄н ма̄гыс манос колыл ке мӯйлуптаве̄н, та порат о̄с олнпот ойтуӈкве паттаве̄н.
Наукат ос литературат на̄нки матыр номт тотсын манос хассын ке, нэ̄пак та̄ратасын, тыима̄гыс о̄с ойтхатуӈкве э̄ри. Ос ляпа рӯтныл о̄пащаще̄кваныл, ща̄нь-а̄щныл, каӈкув-щиныл, а̄ги-пыгныл матыр мӯйлупса выгын ке, тувыл на̄лок-олн ойтуӈкве ат э̄ри, туп по̄х хо̄тпаныл виве. Тох е̄мты, о̄нып мане̄н о̄лнэ кол мӯйлупты ке, ты кол ман-са̄вит тынэ о̄лыс, мане тувыл олнпот ойтуӈкве паты.
Ощмарлаӈкве ат а̄ртми
То̄ванакт ма̄хум на̄лок-олн мощщанув ойтнэ ма̄гыс коланыл тыналан порат тынэ мощщаг декларация-нэ̄пакн хансыяныл. Ты ощмар ма̄гыс Государственный Думат са̄ккон пирмайтавес. Ань хотьют арген мощща тынэ нэ̄пакн хансы, тав колэ кадастровый тынэ щирыл ловиньтаве. Ты хосыт э̄лумхо̄лас э̄рнэ са̄витке̄мыл ойтхаты, ла̄палахтыглан ва̄рмаль ат е̄мты.
Кӯщай нэ̄ ла̄вме щирыл, ты ва̄рмаль акваг уральтым о̄ньщаве. Та̄л о̄вылтахтын порат та̄н ловиньтэ̄гыт, хотьют ос манса̄вит хо̄тпа олн ойтын щирыл о̄лэ̄гыт. 2018 та̄л сыс 38 со̄тыра атса̄т э̄лумхо̄лас декларация-нэ̄пак миӈкве патэ̄гыт.
Ань ты хо̄тал мус 8 со̄тыра са̄вит хо̄тпа э̄рнэ нэ̄паканыл хассаныл ос мисаныл. Та̄н пуссын аквъёт хо̄тпан млн. солко̄ви са̄вит бюджетын ойтэ̄гыт тах.
Ма̄хум са̄выӈпа̄лэ юи-о̄выл хо̄талт ойтхатуӈкве ёхтэ̄гыт.
Мо̄лты та̄лныл ма̄хум на̄лок-олнаныл интернет хосыт ойтыяныл. Ты тэ̄ла та̄рапаттын ма̄гыс, тот ёмщакв хансым о̄лы. Тыщир сака ёмас, нэ̄матыр та̄рвит ва̄рмаль а̄тим. Хотьют тӯйтыглахты, та̄н молях хо̄нтавет. Хо̄тпа тыналан колэ Росреестр организацият хансаве. Машина тыналан порат ос автоинспекцият нэ̄пакыт ва̄равет. Тувыл ты нэ̄пакыт пуссын олнпот атнэ колн ке̄тавет.
Са̄в олн ат ойтвес
Ольга Литова ла̄выс, ты хо̄тал мус округувт кол ос ма̄шина о̄щнэ хо̄тпат халт кит млрд. солко̄ви иӈ ат ойтвес. Рӯпитан хо̄тпат на̄лок-олнаныл ойтнэ ва̄рмаль хосыт о̄с са̄в олн а̄рнтаг атхаты. Округувт ты ва̄рмаль щирыл пуссын аквъёт са̄тлов арыгтем млрд. солко̄ви са̄вит а̄рнта е̄мталы.
Ка̄сыӈ хо̄тпа олнпот ёмщакв ойтуӈкве паты ке, округ бюджетув са̄вми, ты олныт пуссын э̄рнэ тэ̄лат ма̄гыс холтавет. Мо̄лты та̄л округ бюджетын онтырса̄т нупыл кит млрд. солко̄ви на̄лок-олн ойтыглавес. Тыитныл муниципалитетн налыман нупыл кит млрд. солко̄ви ке̄тыглавес.
Кӯщай нэ̄ ла̄выс, яныгпо̄ль э̄тпос 25-26 хо̄талыгт мир олнпот ойтнэ колн ёхталаӈкве ве̄рме̄гыт. Та̄н тот декларация-нэ̄пак хансуӈкве нё̄тавет тах.
Николай Меров
#ЛуимаСэрипос #статьиОРНГ #ТекстНаМансийском