Ханты-Мансийск ӯст ЮГУ-колт ма̄ньполь э̄тпос 2 хо̄талэ̄т яныг сапра̄ни о̄лыс, сосса мирыт ма̄гсыл хансым са̄кконыт урыл потыртаӈкве ма̄хум тот акван-атхатыгласыт.
Россият мощщаг хультум мирыт ӯргалым о̄ньщавет, та̄н ма̄гсыланыл са̄всыр са̄кконыт пирмайтавет. Тувыл то̄ва са̄кконыт э̄рнэ щирыл ат рӯпитэ̄гыт ос та̄н онтас ёмащакв ат ва̄ре̄гыт. Сосса мирыт мӯсхалыг хумус ӯргалаӈкве, манхурип э̄рнэ ла̄тӈыт са̄всыр са̄кконын хансуӈкве э̄ре̄гыт, учёныит, кӯщаит, ханищтан хо̄тпат, студентыт пуссын аквъёт ты конференцият потыртасыт.
Э̄лумхо̄лас праванэ ӯргалым рӯпитан нэ̄ Наталья Стребкова ань йист хо̄нтлан сосса ма̄хум урыл потре о̄лыс. 2022 та̄л сӯкыр э̄тпос па̄сныл ма̄н округувныл то̄ва ма̄ньщи, ханты ос ё̄рн хумыт хо̄нтлан ма̄н тотве̄сыт. Ты юи-па̄лт Россият нэ̄пак пирмайтавес, щар ма̄к э̄рнэ рӯпата ва̄рнэ хо̄тпат хо̄нтлаӈкве ул вос ке̄тавет. Са̄лы ӯрнэ ма̄хум ва̄рнэ рӯпатаныл о̄с тув хасвес. Наталья Васильевна ла̄выс, сосса ма̄хум общинат рӯпитан хум хо̄тпат ты нэ̄пакн о̄с вос хансавет, Ассамблея депутатыт ёт та̄н акван-нё̄тхатым ань рӯпитэ̄гыт.
Материал на сайте https://khanty-yasang.ru/luima-seripos/no-7-1313/18162 #ХантыМансиМир #ЛуимаСэрипос #статьиОРНГ #ТекстНаМансийском
Присоединяйтесь к ОК, чтобы подписаться на группу и комментировать публикации.
Нет комментариев