✒ Кев вўӆєӊ ёх 73-мит є̈мӑӊхӑтӆ

Тәнӆуп тыӆӑщ 22-мит хӑтӑӆн Сўмӑтвош район Саранпауль кәрт пўӊӑӆн вәӆты кӑсты вўӆєӊ ёх 73-мит є̈мӑӊхӑтӆ постӑсӑт. Тӑм кӑсупсы кӑт оӆ мӑр ипўш ӆэщӑтӆы. Щит пӑта вўӆыйн кӑсты ёх є̈мӑӊхӑтӆ ӆавӑӆман тӑйӆӑт.
Кашӑӊ оӆ тыв я̆м арат мойӊ мир юхтыйӆ. Тӑм оӆ мєт ар ёх әмӑщ кӑсупсы вантты ӆӑӊхасӑт. Ӆыв кўтэӆн Сўмӑтвош район кәща В. Фомин депутатӑт пиӆа, Саранпауль кәрт кәща П. Артеев, Югра мўв шуши мир Ассамблея кәща Е. Айпин, округ депутат А. Новьюхов, Государственной Дума депутат Т. Гоголева па ӆўвеӆа нётты вухаӆь нє Н. Алексеева па па вуӆаӊ кәщайт па арсыр тӑхет эвӑӆт тынӑӊ мойӆупсэт тәрум пӑта мойӆум ӆыв саттэӆа вєр тӑйты ёх.
Юхтум кәщайт мєт апрӑӊа вўӆы тащӑтн рәпитты ёха ишӑкты нєпекӑт мойӆӑсӑт. Ӆыв кўтэӆн Югра мўв Дума кәща ӆӑӊкӑр хә Еремей Айпин «Югра мўв вўӆы ӆавӑӆты вуӆаӊ хә» нємпи мевӆ пос Андрей Канева мойӆӑс. Вантэ, тӑм хӑннєхә ар оӆ мӑр тарма вўӆэт ӆавӑӆман вәӆ.
Юхи хӑщум оӆӑт иты вўӆєӊ ёха мосӑс вўӆы пӑсты кўрумн хәхӑӆты, вўӆыйн кирум әхӆӑтн наврӑӆтыйӆман, әхӑӆн ӆоӆьман, вўӆэт ю̆пийн ӆухн мӑнман кӑсты. Имет кўтн вўӆы әхӑӆн кӑсты вєрн па ипўӆяӊ мӑнум вўӆєӊ ёх пєӆа мєт әмӑщ вәс вантты. Ия̆ха ӆўӊӑтты ки, кӑсты хӑра хәскєм вўӆы әхӑӆ єтӆяс.
Щи кӑсупсыйн ипуӆяӊ вўӆы әхӑӆн иса кӑсты ёх кўтн мєт ӛрӑӊа Василий Ромбандеев вәс. Кимит – Сергей Чупров юхтӑс, хәӆмит Аркадий Хозяинов вәс.
Вўӆы пӑсты кўрумн хәхӑӆты щирн Анатолий Сметанин оӆӑӊмит юхтӑс. Кимит – Сергей Чупров па хәӆмит тӑхия Алексей Тихонов питӑс.
Вўӆыйн кирум әхӆӑтн наврӑӆтыйӆман Сергей Чупров мєт я̆ма вәс. Кимит тӑхи Василий Ромбандеев вўс. Хәӆмит Анатолий Сметанин юхтӑс.
Әхӑӆн ӆоӆьман Алексей Тихонов оӆӑӊ тӑхия питӑс. Кимит тӑхи Александр Рочев хоӆумтӑс. Хәӆмит – Дмитрий Солянов вўс.
Имет кўтн оӆӑӊмит тӑхия Анна Ромбандеева питӑс. Кимит Марина Чупрова юхтӑс. Хәӆмит тӑхи Наталья Хозяинова вўс.
Вўӆэт ю̆пийн ӆухн мӑнман кӑсупсыйн Аркадий Хозяинов мєт така ӆоӆяс. Кимит тӑхи Дмитрий Солянов хоӆумтӑс. Хәӆмит – Александр Рочев юхтӑс.
«Мєт айӆат вўӆєӊ хә» нєм Сергея Хатанзеевая мӑсы.
Щи тумпийн є̈мӑӊхӑтӆ пурайн арӑӊ-якӑӊ хӑр ӆэщӑтсы. Якты хот «Салы лёӊх» (рўщ щирн «Оленьими тропами») нємуп арӑӊ-якӑӊ пушхӑт па айӆат ёх оӆӊитсӑт. Щи тумпи вәншӑк па айшӑк артистӑт хурамӑӊ арӑт арисӑт, әмӑщ якӑт мира ванӆтӑсӑт. Мосӆ ястӑты, арӑӊ-якӑӊ мир кўтн пиӆ округ эвӑӆт хӑнты арӑт ариты хә Валентин Вальгамов па Ёмвошев эвӑӆт Лозьва мўвн сєма питум айӆат вухаӆь хәйе Евгений Анямов вухаӆь ясӑӊӑн ӆэщӑтум рәт мўв оӆӑӊӑн йиӆуп рэп щирн ар ванӆтӑсӊӑн.
Щи кўтн ӛращты вєрӑт мосман тӑйты хуятӑт пӑта увӑс мир кӑсупсэт ӆэщӑтсыйт. Кашӑӊ хӑннєхә тӑта әхӑӆ шәпи навӑрты, ӛхӑӆ эвӑӆт нёӆ єсӑӆты, тынщӑӊ сўва ёвӑӆты, ю̆х шәп таӆты па па арсыр щирн кўтэӆн кӑсты вєритсӑт.
Щи тумпийн кӑсты па мойӊа юхтум мир пӑта нємасыя нюки хотӑт омӑссыйт. Тӑта вўӆыйн кӑсты ёх, кәщайт, шўкщӑты вєрӑт тәса вәты имет-икет па увӑс мир ӆєтутӑт тынєсты кєши атэӆт нюки хотӑт рәпитсӑт.
Щӑӆта кашӑӊ хӑннєхә вєритӑс «Вўӆы па хӑннєхә. Муртӑӊ хур» нємуп вўӆєӊ ёх оӆӑӊӑн йис хурӑт вантты. Тӑм мосты ванӆтупсы ар оӆ мӑр Саранпауль кәрт йис пурмӑсӑт ӑкӑтты па шавиман тӑйты хотн рәпитты вухаӆь ими Любовь Стаканова ӆэщӑтӑс. Хурӑт пєӆа вантман имухты уша йиӆ, муй щирн катра пурайн вўӆэт ӆавӑӆты ёх вәсӑт па рәпитсӑт.
Мӑнєма тӑм є̈мӑӊхӑтӆ шєӊк мәстӑс. Вўӆєӊ ёха ищи амӑт вәс. Вантэ, тӑм пўш оӆӑӊмит тӑхия питум хуятӑт тынӑӊ мойӆупсэтн кӑтӆуптӑсыйт. Щит «Ямаха» нємпи карты әхӆӑт, кина аӆьты ӆаращӑт, павӑрт ю̆х па тўтъю̆х євӑтты картэт, «ноутбукӑт», нўви тўт мӑты щўӊкӑт, пєвӑӆты пӑрщӑн хотӑт па па мосты тынӑӊ мойӆупсэт.
Ирина Самсонова
#ХантыМансиМир #ХантыЯсанг #статьиОРНГ #ТекстНаХантыйском