СҮЙӨМ ДЕП АЙТАЙЫНЧЫ

Эңсеген эргүү келип, толкундап турсам дагы.
Сөздөрүн ыр көлүнүн, чакалап сузсам дагы,
Өзүңө ак сүйүүмдү, сөз менен айткым келип,
Ыр жазгым келбей турат, көңүлүм бурсам дагы.
Чыгынып кеч болсо да, жаныңа барайынчы,
Апакай колдоруңду аярлап кармайынчы.
Уламдан улам эле ырларда сүйөм дебей,
Көзүңө карап туруп сөз менен айтайынчы.
Кучакка бекем кысып, чачыңдан аяр сылап,
Ашыгым берейинчи сүйүүнүн ырын ырдап.
Ырымды шылтоо кылбай, сөз эмес антым берип,
Сүйөм деп айтайынчы, жарыгым сага чындап.
Элесиң тумар кылып, кыйноону эч кенебей,
Ырларда жазыптырмын сүйүүнү эч ченебей.
Ууртуңдан сүйүп туруп сүйөм деп айтайынчы,
Кур эле ырларымда сүйөм деп айта бербей.
Турмушта далилдейин жароокер жаркылдагым,
Сүйүүнүн улуулугун ыр менен далилдебей.
Жазган: Жыргалбек Усенов. 25.08.2025.
22:03 Москва