БИЛИП ЖҮР

Кейибе кара көздү бөлөп жашка,
Алдыга ишенимдүү кадам ташта.
Чыйралгын сыноо келсе багынбагын,
Бул күнүң бүгүн бөлөк, эртең башка.
Жаз келсе алма, өрүк ачат бүрүн,
Жыт аңкып айланага ачып гүлүн.
Агарып тирүүлүктүн атат таңы,
Канчалык каптаса да кара күүгүм.
Бул жашоо бирде ачуу, бирде таттуу,
Эрдик го өткөн күндү унуткаруу.
Жылуулук берип нурун чачат күн да,
Учуруп шамал кетет булуттарды.
Сабыр кыл ыйлай бербе аарчы жашың,
Жеңилбе тик карагын, көтөр башың.
Бут тосуп ичи тарлар көрө албаса,
Билип кой сен алдыда баратасың.
Пендеге Жаратканым сыноо берет,
Чыдасаң аркасынан бакыт келет.
Умтулуп алды жакка баса бергин,
Баарысы убактылуу өтүп кетет.
Жалындап оттой болуп күйүп жаша,
Жаркырап күндөй болуп күлүп жаша.
Ушак сөз, жалгандага башыңды ийбей,
Жашоонун таттуулуугун билип жаша.
Сүйдүргүн, өзүң дагы сүйүп жаша.
Жазган: Жыргалбек Усенов. 21.08.2025.
13:35 Москва.