ЭТТИ ТАНДАГАНДЫ БИЛЕСИЗБИ?

Эт- адам баласынын организминин толук кандуу өнүгүүсү үчүн керек болгон эң пайдалуу азык. Белок, кичи элемент жана көптөгөн витаминдердин булагы болуп эсептелинет. Эт тамак- аштын дээрлик бардык түрүнө кошулгандыктан анын табитти ачкан даамдуу жыты болушу маанилүү.
Эт бат бузулат
Эт тез бузулуучу азыктарга киргендиктен, аны туура эмес сактасаңыз бат эле жыттанып кетет. Андыктан ар дайым муздаткыча же салкын жерге сактаганыңыз дурус. Эгер муздаткычтын тоңдургучуна сактагыңыз келбесе, анда муздаткычтын ичине кагазга ороп, сыртынан бир аз уксуска чыланган марли менен жаап коюңуз. Мындан сырткары, жаңы эле союлган малдын жылуу этинен тамак жасаганга болбойт. Даамы да, жыты да жакшы чыкпай калат. Эт муздап бир аз тыныгыш керек.
Этти соода борборлорунан эмес базардан алыңыз
Сапаттуу жана жаңы эт алуу кааласаңыз, анда соода борборлорундагы азык- түлүк саткан жайга эмес базарга барыңыз. Сапаты жогору болот жана тандоо мүмкүнчүлүгү бар. Ал эми соода борборлорунда жаңы эмес жана сырткы көрүнүшүн жакшыртыш үчүн ар кандай заттарды кошуп коюшу ыктымал.
Тастыктама сураңыз
Эт сатуучудан ветеринардык документ суроого укугуңуз бар жана аны талап кылууда сатуучу сөзсүз көрсөтүшү керек. Кайсы мөөнөттө берилгенин караңыз. Ветеринардык жана санитардык экспертизадан өткөрүлгөндүгү тууралуу тастыктама жана эт сатууга уруксат берилген кагаз болушу керек. Эгерде кандайдыр бир шек саноого кабылсаңыз, дароо Ветеринария менен алектенген мекемеге жана укук коргоо кызматкерлерине кайрылыңыз.
Ишенимдүү касапчы
Этти айына жок эле дегенде 2-3 жолу сатып аласыз. Андыктан ишенимдүү касапчы таап алыңыз. Өңүңүздөн тааныган сатуучу сизге сапаттуу эт сунуштайт. Кабатырланбай ала берсеңиз болот.
Өңүнө караңыз
Өңү кара же өтө эле кызыл болбошу керек.
Үстүңкү катмарына көңүл буруңуз
Эттин кургаган үстүңкү катмары жука жана кызгылтым болсо, анда ал жаңы эт. Этте эч кандай башка өңдөр жана шек санаткан тактар болбошу керек. Ошондой эле былжыр чел кабыгы кургак болушу шарт. Этти алаканыңызга салганда жабышпаш керек.
Жыттап көрүңүз
Эт сатып алаарда аны тартынбай эле жыттап көрүңүз. Адам баласында табигый өзгөчө жыт сезүү сапаты болгондуктан, этти жыттап көргөндө анын сапатын дароо эле билесиз. Жаңы, сапаттуу болсо андан эртерээк эле үйгө барып тамак жасагыңыз келет. Эгер жыты жакпай ирээнжитсе, демек эт эски.
Майына караңыз
Сапаттуу уйдун этинин майы ак болот. Ал эми койдун майы крем өндүү болот. Уйдун этинин майы үбөлөнүп турса ,ал эми койдун майы ныкталып турса, анда эт сапаттуу.
Бармак басып көрүңүз
Этти бармагыңыз менен катуу басып көрүңуз. Эгер бармактан калган оюкча дароо калыбына келсе, анда эт сапаттуу.
Касапчыдан кеңеш сураңыз
Эгер конок тосууга камынып эт сатып ала турган болсоңуз, алгач кандай тамактын түрлөрүн жасайсыз аныктап алып, андан кийин гана ага ылайыктуу эт алыңыз. Сорпо жасай турган болсоңуз касапчы менен кеңешип кайсы устукандар ылайыктуу келээрин сурап жана бөлүктөргө бөлдүрүп алыңыз. Кээ бир айымдар жакшы эт сатып алышканы менен аны даярдоого келгенде бөлүктөргө туура бөлө албай бузуп салышат.
Даярдоо
Эт тамак- аштын дээрлик бардык түрүнө кошулгандыктан анын табитти ачкан даамдуу жыты болушу маанилүү. Эт кокусунан бир аз жыттанып кетсе, аны жок кылуу үчүн курчутмаларды салбаңыз. Алар жман жытты жана даамды бузат. Ашкана уксусунан теңме тең суу кошуп беш мүнөткө чылап коюп, андан кийин муздак сууга бир нече жолу чайкасаңыз жеңил жаман жыты кетип калат.