ЭГИЗ ЖҮРӨК

Сүйүү тунук булак болуп агышы,
Махабаттын үмүт отун жагышы.
Ишендирди кызыгына дүйнөнүн,
Сезимдердин кеч болсо да табышы.
Сен деп соккон жүрөгүмдү туйлатат,
Мен деп соккон жүрөгүңдүң кагышы.
Көңүл коштоп, комуз күүнүн ыргагын,
Көөдөн ырдап назик арзуу ырларын.
Эргип турам, ээ боло албай өзүмө,
Эми билип бул жашоонун жыргалын.
Сезип турат, сендеп соккон жүрөгүм,
Мен деп соккон жүрөгүңдүн сырларын.
Кыналышып бойлор бойго жарашып,
Сүйүү толгон көздөр менен карашып.
Бел байладык бирге өмүр сүрүүгө,
Бирибизге бирибизди каалашып,
Калат дайым сен деп соккон жүрөгүм,
Мен деп соккон жүрөгүңө жанашып......
Жазган: Жыргалбек Усенов. 03.08.2025.
20:00 Москва.