На прасторы, шырока і вольна, упіраючыся адным краем у пойму ракі Шчара, разлеглася вялікая вёска з прыгожай назвай Дабромысль.

Вучоныя-тапанімісты ў адзін голас сцвярджаюць, што назва паселішча ўтворана ад старажытнага славянскага імя Дабромысл з дапамогай суфікса -ј (перадаеца праз -ль). У аснове імя Дабромысл словы «добр»- добры і «мысль». Сэнсавае значэнне імя - добразычлівы, сумленны чалавек.
Упершыню вёска ўпамінаецца ў запісах падараванняў і грамат вялікага князя Казіміра. Гэтыя дакументы (датуюцца 1440-1490 гадамі) перапісаў пісар Аляксандр Красеўскі па даручэнні Льва Сапегі, канцлера, старасты слонімскага і блудзенскага.