Дар сарҳади Тоҷикистону Қирғизистон ҳашари дастаҷамъонаи сокинони Исфараю Бодканд баргузор шуд

Дар минтақаи «нейтралӣ”-и байни гузаргоҳҳои сарҳадии “Гулистон”-и Исфараи Ҷумҳурии Тоҷикистон ва “Қизилбел”-и ноҳияи Бодканди Ҷумҳурии Қирғизистон ҳашари ободкориву тозанамоӣ ва оши дӯстӣ баргузор шуд.
Иқдоми мазкур бо сарварии роҳбарияти ду ноҳияи ҳаммарз, аз ҷумла раиси шаҳри Исфара Баҳоваддин Баҳодурзода ва раиси ноҳияи Бодканд Учқунбек Жоробоев сурат гирифта, дар он сокинон корҳои тозакориву поккориро анҷом доданд. Баъди анҷоми ҳашар ба иштирокдорон оши дӯстӣ ташкил карда шуд.
Бояд гуфт, ки иқдоми мазкур дар партави дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рӯйи кор омада, идомаи ташаббусҳои раисони вилоятҳои ҳаммарз, барномаҳои рӯйидастдоштаи ҷонибҳо оид ба таъмини фазои сулҳу субот ва таҳкими робитаҳои ҳамсоядории нек мебошад.
Бори аввал баргузор шудани ҳашари дӯстонаи ҳамсояҳо ва нишастан сари дастархон баъди баста шудани марзи ду давлат далолат аз оғози ҳамгироии аҳолӣ мебошад, ки онро сарварони ду давлат: Пешвои миллат муҳтарам Эмомалӣ Раҳмон ва Президенти ҳамосякишвар муҳтарам Содир Ҷабборов мудом таъкид менамоянд.
Дар назар аст, ки дар минтақаи нейтралии мазкур корҳои ободониву кабудизоркунӣ идома дода шуда, он пурра асфалпӯш карда хоҳад шуд.