Խոսք ընտրողին.

Նախընտրական խոսքը ուժ չունի՝ հավատի պակասի ու քանիցս ընտրողին խաբված թողնելու արատավոր երևույթի պատճառով։ Մարդիկ անգամ չեն էլ կարդում նախընտրական ծրագրերը՝ համոզված լինելով, որ դրանք ընդամենը ընտրական գործընթացի, այլ ոչ՝ իրականացման համար են։
Երկար-բարակ համոզելու փոխարեն ասեմ՝ իմ բնակավայրը Կապանն է, և անկախ ընտրության արդյունքից, շարունակելու եմ ապրել այստեղ և, բնականաբար, ինձ համար միևնույն չէ, թե ինչպես են Սյունիքը ու հատկապես Կապանը դուրս մնում տնտեսական և նպատակային ծրագրերից։
Գաղտնիք չէ, որ երբեմնի արդյունաբերական Կապանը այսօր դարձել է գործազրկության մայրաքաղաք։ Անկախության ողջ շրջանում պետությունը Սյունիքի մարզկենտրոն Կապանում կառուցել է մեկ շենք՝ դատարանի շենքը։ Կարծես, մենք, բացի հարմարավետ պայմաններում դատվելը, այլ բանի արժանի չենք։
Մինչդեռ, ՀՀ անկախության և արցախյան գոյամարտի համար ամենածանր գինը վճարել է հենց Սյունիքը, հատկապես Կապանը։ Երբեմնի ծաղկուն քաղաքը աչքներիս առաջ մարում է։ Անտարբեր չեմ նաև ծննդավայրիս՝ Քաջարանի ճակատագրի հանդեպ։ Քաջարան գյուղը հանքարդյունաբերությունից հեռու պահելու գյուղացիների ընդվզումը ևս օրենսդրական կարգավորման կարիք ունի։
Ցավ եմ ապրում, որ Մեղրիում, Սիսիանում և Գորիսում ևս առարկայական, նպատակային ծրագրեր կյանքի չեն կոչվում։ Մինչդեռ կարելի էր։Տարիների հանրային աշխատանքի փորձը թույլ է տալիս կարծելու, որ անհրաժեշտ է Կապանում հրավիրել կառավարության արտագնա նիստ և շահագրգիռ բոլոր կողմերի մասնակցությամբ քննարկել «Սյունիքի սոցիալ-տնտեսական զարգացման մասին» ՀՀ օրենքի նախագիծ, ԱԺ ներկայացնելու համար։
Այլևս՝ «նպաստել աշխատատեղերի ստեղծմանը», «աջակցել տնտեսական աճին» և նման ձևակերպումները, կարծում եմ, ժամանակավրեպ են։ Հարկ է՝ օրենքի ուժով կառավարությանը պարտավորեցնել Սյունիքում նպատակային ծրագրեր իրականացնել, նշելով պատասխանատուներին և սահմանել հստակ ժամանակացույց։ Առանցքային եմ համարում Սյունիքի կադրային բանկի ստեղծումը, որը պետք է ապահովի տեղաբնակների պաշտոնեական առաջխաղացումը և կանխի առանց բացատրության դրսից պատասխանատուներ հրավիրելու արատավոր երևույթը։
Համոզված եմ, որ ներկա ընտրական համակարգի դեպքում տարածքի պատգամավորը պետք է դառնա իր ընտրատարածքի խնդիրները կառավարության առաջ դնող պաշտոնյան։ Ինչևէ, առարկայական ծրագրերի քննարկման փոխարեն, որոնք, ի դեպ, ունեմ, խնդրում եմ՝ գնալ ընտրության և անտարբեր չմնալ երկրի առաջիկա տարիների կյանքի ուղին կանխորոշող որոշումից։ Համատեղ, հրապարակային աշխատելու պատրաստակամությամբ ապավինում եմ, բացառապես սրտացավ, ուղղաձիգ քայլող սյունեցու ընտրությանը։
Հարգանքով՝ ՀՀ ԱԺ պատգամավորի թեկնածու 9/7. Սասուն Մանուկյան ✓