👉 Qimmat gilam arzonga ketdi

— Amaki gilam olmaysizmi? Pul juda zarur bo‘lganligi uchun sotmoqchiman.
— Mabodo gilaming o‘g‘irlangan emasmi?
— Qiziqsiz-a! Shunday katta gilamni o‘g‘irlab bo‘larkanmi? Qizimning sepiga olgandim. Biroq quda tomonga yoqmadi. Arzon emish, qimmatidan shoyi-ipakligidan olishimiz kerak ekan.
— Qancha so‘rayapsan?
— Bir million.
— Yonimda 850 ming so‘m bor. Rozi bo‘lsang, ber, yo‘qsa, boshqasiga sotaver.
— Mayli, beraqoling. Pul juda zarur-da, bo‘lmasam bermasdim.
Notanish kimsa narxi 4 million so‘m bo‘lgan gilamni suv tekinga oldi-da, ko‘tardi-Yu ketdi. Savdo pishib, har ikki tomon foydadan ko‘ngli chog‘ bo‘lib o‘z yo‘llariga ketayotgan paytda: 2024 yilning 30 apreli, soat 16.00 larga yaqin “Qo‘yliq” savdo majmuasi do‘koni sotuvchisi A.Lazizbek eʼtiborsizligi uchun o‘zini qo‘yishga joy topolmay, oyog‘ini qo‘liga olib, qaydasan ichki ishlar idorasi deya, mol achchig‘ida taksi yollab idoraga shoshilayotgandi. Bektemir tumani IIO FMB navbatchilik qismiga halloslagancha kirib kelgan sotuvchi, voqeani shoshqaloqlik bilan bayon etdi. Xodimlarning zudlik bilan chora ko‘rishi natijasida 1977 yilda tug‘ilgan, muqaddam o‘g‘irligi uchun bir necha marta sudlanib, qamalgan A.Saken surishtiruv ishlari olib borish uchun mahkamaga keltirildi. Uning jinoyatini yashirish uchun qilgan iddaolari ish bermadi. Bozor hududiga o‘rnatilgan videokuzatuv kameralari uning qilmishlarini so‘zsiz fosh etdi.
— Do‘konim kichkina bo‘lganligi bois, gilamni xaridorlarga ko‘rsatish maqsadida eshik oldiga suyab qo‘ygandim, – deydi do‘kon egasi A.Lazizbek. – Boshqa xaridorlar bilan ovora bo‘lganimdan foydalanib, 2x10 metr bo‘lgan oq-sariq gulli gilamni o‘g‘irlab ketibdi.
Jinoyat ishlari bo‘yicha Bektemir tuman sudi ochiq sud majlisida A.Sarsenning qilmishlarini ko‘rib chiqib, O‘zbekiston Respublikasi Jinoyat kodeksining 169-moddasi 3-qismi “a” bandi (“O‘g‘irlik”) bilan aybli, deb topdi. Sud uning aybiga iqrorligi, yetkazilgan zararni qoplaganligi, pushaymonligi, jazoni og‘irlashtiruvchi hamda yengillashtiruvchi holatlarni inobatga olib, 5 yilga ozodlikdan mahrum etish jazosini tayinladi.
Mazkur jinoyat ishi tafsilotlari Bektemir tumani IIO FMB huzuridagi Tergov bo‘limi tergovchisi, katta leytenant Muhammadrizo Eshpo‘latovning ish yurituvidan olindi.
👉 Қиммат гилам арзонга кетди
— Амаки гилам олмайсизми? Пул жуда зарур бўлганлиги учун сотмоқчиман.
— Мабодо гиламинг ўғирланган эмасми?
— Қизиқсиз-а! Шундай катта гиламни ўғирлаб бўларканми? Қизимнинг сепига олгандим. Бироқ қуда томонга ёқмади. Арзон эмиш, қимматидан шойи-ипаклигидан олишимиз керак экан.
— Қанча сўраяпсан?
— Бир миллион.
— Ёнимда 850 минг сўм бор. Рози бўлсанг, бер, йўқса, бошқасига сотавер.
— Майли, берақолинг. Пул жуда зарур-да, бўлмасам бермасдим.
Нотаниш кимса нархи 4 миллион сўм бўлган гиламни сув текинга олди-да, кўтарди-ю кетди. Савдо пишиб, ҳар икки томон фойдадан кўнгли чоғ бўлиб ўз йўлларига кетаётган пайтда: 2024 йилнинг 30 апрели, соат 16.00 ларга яқин “Қўйлиқ” савдо мажмуаси дўкони сотувчиси А.Лазизбек эътиборсизлиги учун ўзини қўйишга жой тополмай, оёғини қўлига олиб, қайдасан ички ишлар идораси дея, мол аччиғида такси ёллаб идорага шошилаётганди. Бектемир тумани ИИО ФМБ навбатчилик қисмига ҳаллослаганча кириб келган сотувчи, воқеани шошқалоқлик билан баён этди. Ходимларнинг зудлик билан чора кўриши натижасида 1977 йилда туғилган, муқаддам ўғирлиги учун бир неча марта судланиб, қамалган А.Сакен суриштирув ишлари олиб бориш учун маҳкамага келтирилди. Унинг жиноятини яшириш учун қилган иддаолари иш бермади. Бозор ҳудудига ўрнатилган видеокузатув камералари унинг қилмишларини сўзсиз фош этди.
— Дўконим кичкина бўлганлиги боис, гиламни харидорларга кўрсатиш мақсадида эшик олдига суяб қўйгандим, – дейди дўкон эгаси А.Лазизбек. – Бошқа харидорлар билан овора бўлганимдан фойдаланиб, 2х10 метр бўлган оқ-сариқ гулли гиламни ўғирлаб кетибди.
Жиноят ишлари бўйича Бектемир туман суди очиқ суд мажлисида А.Сарсеннинг қилмишларини кўриб чиқиб, Ўзбекистон Республикаси Жиноят кодексининг 169-моддаси 3-қисми “а” банди (“Ўғирлик”) билан айбли, деб топди. Суд унинг айбига иқрорлиги, етказилган зарарни қоплаганлиги, пушаймонлиги, жазони оғирлаштирувчи ҳамда енгиллаштирувчи ҳолатларни инобатга олиб, 5 йилга озодликдан маҳрум этиш жазосини тайинлади.
Мазкур жиноят иши тафсилотлари Бектемир тумани ИИО ФМБ ҳузуридаги Тергов бўлими терговчиси, катта лейтенант Муҳаммадризо Эшпўлатовнинг иш юритувидан олинди.
#tergov_amaliyotidan #из_следственной_практики