Գյումրիից դիմել են Ս.

Սարգսյանին՝ սգո օրեր հայտարարելու համար, սակայն վերջինս փաստորեն մերժել է
Գյումրիում սգո օրեր հայտարարելու համար Գյումրիից դիմել են Ս. Սարգսյանին, սակայն ստացվում է, որ վերջինիս իր համաձայնությունը չի տվել, որ սգո օրեր հայտարարվեն:
Գյումրու քաղաքապետ Սամվել Բալասանյանը, պատասխանելով լրագրողների այն հարցին, թե ինչն էր պատճառը, որ անդադար խոսում ու պահանջում էին, որ Գյումրիում սգո օրեր հայտարարվեն, սակայն դա չեղավ, եւ արդյո՞ք Գյումրու քաղաքապետի արձակուրդում գտնվելու փաստով էր պայմանավորված, պատասխանեց, որ իր՝ արձակուրդում գտնվելու փաստը կապ չունի, քանի որ Գյումրիում սգո օրեր հայտարարելու որոշում ինքը չէր կարող կայացնել, ավելին, ըստ Բալասանյանի, ավագանին էլ նման որոշում ընդունել չի կարող եւ անհրաժեշտ էր կամ նախագահի, կամ էլ խորհրդարանի որոշումը: Այն հարցին, թե չե՞ն դիմել Ս. Սարգսյանին, Սամվել Բալասանյանն ասաց. «Ոնց որ թե դիմել են, նույնիսկ էնտեղ ոնց որ թե դիմել են, դե մնացածը չգիտեմ…»,-ասաց Ս. Բալասանյանը՝ չկոնկրետացնելով, թե ով է եղել դիմողը:
Նա ասաց, որ Գյումրու քաղաքապետարանից չեն եղել. «Մենք չենք դիմել ոչ մեկին, բայց ցանկացել էինք, որ անպայման սգո օր լինի, դա պետք է որոշվեր խորհրդարանի կամ էլ նախագահի կողմից: Ավագանին նման իրավասություն չունի, վերցրե՛ք Տեղական ինքնակառավարման մասին օրենքը նայեք, մենք ուսումնասիրել ենք չկար այդպիսի կետ»:
Մեր այն հարցին, թե եթե ամեն դեպքում դիմել են Ս. Սարգսյանին, ինչ է ասել, ինչո՞վ է պատճառաբանել մերժումը, Բալասանյանն ասաց, որ ընդհանուր պրոցեսներից տեղյակ չէ: