7 лютага за кратамі спаўняецца 36 гадоў музыку і палітзняволенаму брэстчаніну Сяргею Нікіцюку.

Сяргей родам з Брэста, жыў у Жабінцы. Вучыўся ў Валынскім нацыянальным універсітэце імя Лесі Украінкі. У яго ёсць непаўнагадовае дзіця.

21 лістапада 2022 года Брэсцкі абласны суд асудзіў Сяргея за «абразу Лукашэнкі» і «садзейнічанне экстрэмісцкай дзейнасці». Суддзя Дзмітрый Куроўскі прызначыў яму тры гады пазбаўлення волі ў калоніі ва ўмовах агульнага рэжыму — менавіта такое пакаранне прасіў пракурор Аляксандр Бацюшка.

Нагодай для пераследу зрабіўся каментар «трепло» ў суполцы «Белсат TV» у «ВКонтакте» пад навіной з цытатай Лукашэнкі. Другі эпізод абвінавачвання тычыцца таго, што 27 лютага 2022 года, у дзень рэферэндуму, Сяргей адправіў у бот рэдакцыі NEXTA фота свайго бюлетэня з дзвюма птушачкамі.

Адрас для лістоў: ПК №3, 211300, п. Віцьба, Віцебская вобл., Віцебскі раён. Сяргей Юр'евіч Нікіцюк.