Ների'ր, որ թույլ եմ տվել շատերին,

Մեր սիրո հարցում մի պահ կասկածել,
Գերի էի դարձել իմ պատրանքներին,
Ու դրանով քեզ շատ եմ վնասել։
Ների'ր, որ տեղ եմ տվել շատերին,
Այնինչ այդ տեղը քեզ է պատկանել,
Հավատացել եմ իմ սին մտքերին,
Ու քեզ դրանով շատ եմ նեղացրել։
Ների'ր, որ հույս եմ տվել շատերին,
Մինչդեռ այդ հույսը քեզ է պետք եղել,
Լույսով եմ լցրել շատերի հոգին,
Ու դրանով քեզ խավարում թողել։
Ների'ր, որ սիրտ եմ տվել շատերին,
Աջ ու ձախ սիրտս շատ եմ բաժանել,
Արժեք եմ տվել ամենքի խոսքին,
Ու դրանով քեզ շատ եմ լացացրել։
Ների'ր, որ սատար եղա շատերին,
Այնինչ կարիք կար լոկ քեզ պաշտպանել,
Ինձ նվիրել եմ ամբողջ աշխարհին,
Ու դրանով քեզ մենակ եմ թողել։
Ուստի կսպասեմ միշտ քո ներումին,
Քանզի քո հանդեպ շատ եմ սխալվել,
Քեզանից բացի չունեմ այլ մեկին,
Առանց քեզ ես եմ մենակ մնացել։