Երբ ամեն անգամ ուրիշների մեջ
Փորձում ես գտնել ինձանից մի քիչ,
Անունն էլ դնում,
Թե ամենքի մեջ փնտրում ես դու ինձ.
Ընդհակառակը,
Տարալուծու՜մ ես դու ինձ նրանց մեջ
Ու կաթի՜լ - կաթի՜լ կորցնում անվերջ:
Այդպես չե՜ն սիրում, այդպես չի՜ լինում,
Արդարացումներ մի փնտրիր կյանքում,
Այդպես՝ անիմաստ, դատարկ հույսի մեջ,
Հավատարմության տաճա՜րն ես ծախում
Ու ծովածավալ հավատս թաղում...
Ինձ կորցնելով, մեր թանկն ես փնտրում,
Ու քեզ թվում է, թե այն կգտնե՛ս,
Նորից կապրեցնե՛ս ուրիշ ԵՍերում։
Զուր ես հավատում, հրաշք չի լինում.
Նույնն է, թե գժվեմ, ու ես էլ հուսամ,
Թե քեզնից հետո դեռ կգա' մեկը,
Որին կսիրեմ քե'զ պես ու քո' չափ,
Որ իմ անունը
Կկարճի՜ քո պես, կկանչի՜ քո պես
Ու կխենթանամ իմ իսկ անունից,
Ինչպես քո՜ կանչից...
Սուտ է, չի՜ լինի, անգամ չե՜մ փորձի,
Քանզի վստահ եմ,
Որ սերը կյանքում միակն է լինում,
Աստված՝ սիրո մեջ,
Կրկնօրինակը, չէ՜, չի հանդուրժում,
Ուրիշի օտար ու խորթ Եսերում,
Ինձ զու՜ր ես փնտրում...
Լիլիթ Աղասյան
Присоединяйтесь к ОК, чтобы подписаться на группу и комментировать публикации.
Нет комментариев