Գլուխս առնեմ ու կորչեմ այս քաղաքից՝

Ապստամբյալ անզորների քանակից,
Անզենների անզորավար բանակից,
Բաբելոնյան խառնակության շառաչից,
Խաբեության, խանդ ու խայթի շաղախից,
Պահած֊պաշտած անմեղության աղացից,
Այս տիրական ոխ ու վախի վարակից…
Դավ ու դատից գլուխս առնեմ ու գնամ,
Ծիածանի լացով հոգիս լվանամ,
Բևեռներս իրար բերեմ, լրանամ,
Դառնամ ազատ արծիվներին թառակից…
Գլուխս առնեմ ու կորչեմ այս քաղաքից:
_____________
Համո Սահյան