З кнігі - Міфалагічныя ўяўленні беларусаў / укладанне, сістэматызацыя, тэксталагічная праца, уступны артыкул, рэдагаванне / В.С. Новак. – Минск: «Право и экономика». 2010. – 524 с.
Вадзянік касматы, увесь у ціне, лупаты. Сядзіць у вадзе, бармоча, якоча, ваду ўскаламучвае. Для каго добры, а для каго злы. Хто пакрыўдзіць яго, на таго злы, а хто ўладзіць усё – для таго добры.
***
Дамавік – гэта маленькі гномік з барадой. Ён жыве за печкай. Трэба падкармліваць яго. Калі што прападзе, кажуць, што гэта дамавік. Трэба тады задобрыць яго. Прывязаць к табурэтцы чырвоную лентачку або трапачку і гаварыць: Старычок-дамавічок, За абіду прасці, А памажы мне прапажу знайсці.
***
Лазнік жыве ў лазні. Дзяцей малых нехрышчоных у лазні пужае, забірае. Нельга нехрышчоных дзяцей мыць у лазні, а то будуць хва-рэць.
***
Русалкі – гэта ўтопленыя маладыя дзеўкі. Вельмі прыгожыя, любога мужчыну зачаруюць. Добрага ад іх мала.
Запісана ў в. Нісімкавічы Чачэрскага р-на ад Кузьмянковай Лідзіі Васільеўны, 1954 г.н., студэнткай Пішчук Н. (2006 г.)
Лесавік жыве ў лесе. Ён падобны на чалавека. Калі хто ў лесе заблудзіцца, кажуць, што ён стаў на след лесавіка. Каб выйсці з лесу, рабілі наступнае: трэба зрабіць 3 шагі назад, сесці і разуцца, некалькі шагоў прайсці ўперад і можна абувацца. Сказаць: “Госпадзі, памажы мне выйсці з лесу”.
***
Бог саздаў зямлю. Раней была кругом вада. У кожнага чалавека ёсць свой анёл-ахоўнік. Ён з табой па правую руку. На правую старану нельга пляваць. Рай – гэта прыгожы сад, птушкі там спяваюць, сонца, ежа ўсякая і адзенне. Пекла – гэта месца пакарання грэшнікаў. Там іх на агні смаляць, на крутарэгі круцяць, яны там скавародкі гарачыя ліжуць за брахню.
Запісана ў в. Гацкое Чачэрскага р-на ад Гулевіч Тафілі Кузьмінічны, 1927 г.н., студэнткай Пішчук Н. (2006 г.)
Присоединяйтесь к ОК, чтобы подписаться на группу и комментировать публикации.
Нет комментариев