Ҳаёт...

Фоний бу дунёнинг сарҳадларида,
Чексиз ташвишию, ҳимматларида,
Одимлаб боряпмиз манзил ноаниқ,
Тақдирнинг шодлигу, ҳасратларида.
Сахий қуёш порлар чўлларимизда,
Иймон асо бўлар қўлларимизга,
Балки, синовларнинг лабиринт қасри,
Бизга пешвоз чиқар йўлларимизда.
Майли, туғилдикми демак асармиз,
Аллоҳ насиб қилган онда кезармиз,
Умр деб аталмиш илк китобимиз,
Ҳар битта бобига борин ёзармиз.
Қани, дўстим, кетдик чорлов бизники,
Гоҳ осон, гоҳ қийин сўров бизники,
Сен ва мен одимлаб борар манзилда,
Учраган ҳар битта синов бизники.
Қани, кетдик, дўстим...