"Сайылык оҕолорун оонньуута" түмүктэннэ

ыам ыйын 24 күнүгэр, Сунтаар сэлиэнньэтин "Алмаас" стадионыгар быйыл XII-с төгүлүн ыытыллар "Сайылык оҕолорун оонньуулара" улуустааҕы спартакиада иккис түһүмэҕэ түмүктэннэ. Сылын аайы ыытыллар күрэс сүрүн сыалынан оҕону кыра сааһыттан өбүгэлэрбит төрүт оонньууларыгар сыһыаран этин-сиинин сайыннарыы, норуоппут оонньуутун киэҥ араҥаҕа тарҕатыы буолар.
Барыта Сунтаар улууһун 5 куустатын (Элгээйи, Кутана, Тойбохой, Кириэстээх, Сунтаар) оскуолаҕа киириэн иннинээҕи саастаах оҕолорун сүүмэрдэммит хамаандалара төрүт оонньуу сэттэ көрүҥэр күөн көрүстүлэр.
Спартакиада куустатааҕы түһүмэҕэр биһиги уһуйаантан сэттэ оҕо талыллыбытыттан алтата кыттыыны ылла. Кинилэртэн биэс оҕо бэйэлэрин көрүҥнэригэр миэстэлэһэн, мэтээл кэтэн, Туоһу сурук тутан үөрүү-көтүү көтөллөнөн кэллилэр. Элгээйи куустатын оҕолоро алта көрүҥтэн үс көрүҥҥэ кыайыылааҕынан буоллулар.. "Түү мээчигинэн сыалы таба быраҕыыга" уонна "Ойбонтон уулааһыҥҥа" улууска бастыҥ көрдөрүүнү.биһиги уһуйаан иитиллээччилэрэ Попова Камила уонна Гуляев Данил көрдөрдүлэр. Камила сыалы алтата быраҕан биэһин тапта, Данил үс ыаҕыйаны 00.08.52 сөкүүндэнэн ылан утарсааччыларын ырааҕынан кыайда. Күндэйэ "Күнчээн" уһуйаанын иитиллээччитэ Гурьев Байдам "Кириэс тэбиитигэр" бастакы миэстэни ылла. Бары көрүҥ түмүгүнэн 30 баалы ылан, биһиги куустабыт 10 оҕолоох хамаандата үһүс миэстэни эрэллээхтик ылла.