Сыл бастыҥ иитээччитэ - 2024

Кулун тутар 13-14 күннэригэр Сунтаар улууһун үөрэҕириитин салалтатын көҕүлээһининэн үгэскэ кубулуйбут “Сыл бастыҥ иитээччитэ-2024” күрэс «Ньургуһун» оҕо сайдар киинигэр буолан ааста. Сылын аайы ыытыллар тэрээһин сүрүн сыалынан оскуола иннинээҕи үөрэхтээһин суолтатын үрдэтии, иитээччилэри үрдүк көрдөрүүлэргэ көҕүлээһин, бастыҥ үлэ уопутун тарҕатыы буолар.
Соруктарынан:
иитээччи идэтин таһымын үрдэтии;
билиитин-көрүүтүк кэҥэтии;
үөрэх хаачыстыбатын тупсарыы;
үлэ уопутун атастаһыы;
айымньылаах үлэлээх иитээччилэри арыйыы.
Быйылгы тэрээһиҥҥэ 8 иитээччи кыттыыны ылан үлэтин уопутун тарҕатта. Күрэс түөрт түһүмэҕинэн ыытылынна. Бастакы түһүмэҕи көрүү куйаар ситимин нөҥүө ааста. Манна иитээччи портфолиотын, ситиһиилээх бырайыагын, бэйэни билиһиннэриитин көрдүлэр.
Портфолио;
"Мин ситиһиилээх бырайыагым";
Бэйэни билиһиннэрэр видеоролик.
Иккис түһүмэххэ иитээччи оҕолору кытта дьайымал ыытта. Бу түһүмэххэ иитээччи идэтин төһө баһылаабытын, оҕолору кытта алтыһыытын, ханнык сонун ньымалары дьайымалга киллэрэн туттарын, ФГҮӨС уонна биир кэлим федеральнай үөрэх бырагыраамматын ирдэбилигэр дьарыктаныы төһө сөп түбэһэрин сыаналаатылар.
Дьарыктаныы.
Икки бастакы түһүмэҕи ситиһиилээхтик ааспыт иитээччилэр үһүс түһүмэххэ киирдилэр. Кинилэр бу түһүмэххэ араас тиэмэҕэ маастар-кылаас, төрөппүттэргэ аналлаах сэминээр ыытан көрдөрдүлэр.
Маастар-кылаас;
Төрөппүттэргэ сэминээр.
Кыайыылааҕы быһаарар төрдүс түһүмэх кэпсэтии быһыытынан ыытылынна. Бу түһүмэххэ иитээччилэр тус олохторуттан саҕалаан үөрэх эйгэтигэр киирбит саҥа уларыйыылар, сонун сүүрэннэр тустарынан кэпсэттилэр. Оскуолаҕа киириэн иннинээҕи саастаах оҕолору үөрэхтээһин тыҥаан турар сүрүн соруктарын, ирдэбиллэрин дьүүллэстилэр. Оҕону иитэр-үөрэтэр үлэни тупсарар сонун суолу-ииһи ыйдылар, тус бэйэлэрин көрүүлэрин билиһиннэрдилэр.
Ток-шоу.
Түөрт түһүмэх үлэтин көрөн баран дьүүллүүр сүбэ маннык түмүгү таһаарда:
III Үрдэл кыайыылааҕынан биһиги эдэр иитээччибит Клара Егоровна Яковлева буолла
II Үрдэл кыайыылааҕынан Сахаайа Руслановна Коротова, Сунтаар 7 №-дээх "Солнышко" оҕо сайдар киинин иитээччитэ.
I Үрдэл кыайыылааҕын үрдүк аатын сүктэ Анжелика Николаевна Корнилова, Тойбохой 3 №-дээх "Ньургуһун" оҕо сайдар киинин иитээччитэ.
Муҥутуур кыайыылааҕынан 11 №-дээх оҕо сайдар киинин муусука кэрэ эйгэтигэр уһуйааччыта Надежда Александровна Павлова буолла.
Бары кыттыбыт иитээччилэри, кыайыылаахтары үрдүк таһымнаах күрэскэ кыттыбыттарынан итиитик-истиҥник эҕэрдэлиибит. Кыайыылаах кыттааччы Надежда Александровна улуус чиэһин ситиһиилээхтик көмүскээн кэлэригэр баҕарабыт. Биһиги Клара Егоровнабыт инники да өттүгэр өссө үрдүк кирбиилэри ыла турдун, ситиһииттэн кынаттанан үлэтэ өссө таһаарыылаах буоллун, иитээччи быһыытынан салҕыы үүнэ-сайда турдун!