Евангелие от Луки, зачало 42

Во вре́мя о́но, присту́пльше ко Иису́су обана́десяте ученика́ Его́, реко́ша Ему́: отпусти́ наро́д, да ше́дше во окре́стныя ве́си и се́ла вита́ют и обря́щут бра́шно, я́ко зде в пу́сте ме́сте есмы́. Рече́ же к ним: дади́те им вы я́сти. Они́ же ре́ша: несть у нас вя́щше, то́кмо пять хлеб и ры́бе две, а́ще у́бо не ше́дше мы ку́пим во вся лю́ди сия́ бра́шна. Бе́ху бо муже́й я́ко пять ты́сящ. Рече́ же ко ученико́м Свои́м: посади́те их на ку́пы по пяти́десят. И сотвори́ша та́ко, и посади́ша их вся. Прии́м же пять хлеб и о́бе ры́бе, воззре́в на не́бо, благослови́ их, и сломи́, и дая́ше ученико́м предложи́ти наро́ду. И ядо́ша, и насы́тишася вси, и взя́ша избы́вшыя им укру́хи ко́шя двана́десяте. И бысть егда́ моля́шеся еди́н, с Ним бе́ху ученицы́.
Слава Тебе Господи, слава Тебе!