Ааспыт сылтан И.

Е.Винокуров аатынан Хатыҥ Арыы орто оскуолата төрүт култуура учуутала Алевтина Алексеева этиитинэн оскуола ыһыаҕын тэрийэн, онно уоланнар курэхтэрэ биир кэрэхсиир күүтүүлээх күрэх быһыытынан киирэн биэрбитэ. Оскуола ыһыаҕар 8 кылаастан 11 кылаас үөрэнээччилэрэ, оскуола үлэһиттэрэ бары кыттыыны ыллылар. Ыһыах Алевтина Алексеева салайыытынан ыытылынна. Арчыланыы, ыраастаныы сиэрин-туомун Матрена Новгородова уонна оскуола үлэһиттэрэ, арыыга буспут минньигэс алаадьынан Лена Сивцева, Людмила Винокурова күндүлээтилэр. Уопсай түһүлгэҕэ ис миинин дьон амсайан күүс-уох ылыннылар. Аал уоту аһатан, алгыс тылын этэн Бэдьээлэ аатынан Намнааҕы олоҥхо дьиэтиттэн Владимир Владимирович Сыромятников оһуохайдатта. Хатыҥ Арыы орто оскуолата уонна Бэдьээлэ аатынан Намнааҕы олоҥхо дьиэтэ үс сыл сүбэлэн, түһэрсэн былааннаах үлэ ыытылла сылдьар. Ыһыаҕы төрүт дорҕоонунан Петр Машников, Гаврил Макаров, Михаил Сивцев, Андрей Лукин, Прасковья Винокурова, Екатерина Попова, Матрена Новгородова киэргэттилэр.
Улахан кылаас уолаттарыгар анаан иккис төгүлүн «Уоланнар оонньуулара» ыытылынна. Бу барыйыагы 2024 сыллаах оскуола выпускнига, билигин Чурапчытааҕы физкультурнай институт 1 куурус устудьуона Владимир Стрекаловскай барыйыагынан ыытыллар. Оскуола иһинэн 11 кылаас оҕолоругар анаммыт проект көмүскээһин чэрчитинэн, Владимир 2024 сыл СӨ оҕо спордун сылыгар анаан суруйбута. Бу барыйыагы оскуола администрацията өйөөн, оскуола ыһыаҕын тэрийэн, онно биир көрүҥ быһыытынан киирбитэ. Володя былырыын бастакы барыйыагар бэйэтэ кыттыбыта. Володя оскуолаҕа үөрэнэр кэмигэр чэпчики атлетикаҕа Айхаллаан Григорьевич Местниковка ситиһиилээхтик дьарыктанан, «Спортивные Якутяне» кыттан «Первенство по легкой атлетике бег с барьером» 1 миэстэни ылбыта, нэһилиэккэ «Сыл бастыҥ спортсмена» үрдүк аатын сүкпүтэ.
Быйыл Володя судьуйа быһыытынан бырайыагар кыттыыны ылла. Уопсайа күрэххэ барыта 16 сайаапка киирбититтэн 15 уол 8,9,10 кылаас уолаттара кытыннылар. Күрэх сэттэ көрүҥүнэн — үс төгүл үс, мас тардыһыы, хапсаҕай, сүүрүү — кыыс эккирэтиитэ, сыал быраҕыы, тутум эргиирэ, таас көтөҕүү ыытылынна. Оскуола выпускниктара, бырайыак ааптара Владимир Стрекаловский, Александр Баишев уонна Денис Сидоров күүс-көмө буолан судьуйалаатылар. Тыҥааһыннаах киирсии түмүгүнэн Кылаан кыайыылаах — Стручков Павел 10 кыл., 2 м. — Сивцев Вадим 9 «а» кыл., 3 м. — Колосов Степан 10 кыл. буоллулар. Хас түһүмэх аайы кыайылаахтарга мэтээллэри уонна грамоталары туттардылар. Павел Стручков 2-с сылын бастаан, кыайыы өрөгөйүн биллэ. Хас биирдии кыттыбыт уолга оскуола администрацията 1000 солкуобай бириэмийэ туттардылар.
Күрэхтэһии спонсордара — оскуола иһинэн үлэлиир бизнес инкубатор, анал бириистэри туоруордулар: бырайыак ааптара Владимир Стрекаловскай дьиэ кэргэнин бирииһин 9 «а» кылаас үөрэнээччитигэр Айсен Новгородовка туттардылар.
Оскуола саха тылын уонна литературатын учуутала Матрена Дмитриевна Новгородова аҕатын, кадровай булчут Дмитрий Иннокентьевич Новгородов аатынан бирииһи 9 «а» кылаас үөрэнээччитигэр Леонид Петровка туттарда. Кэскиллээх ыччаппыт Владимир Стрекаловкай оскуолатааҕы баҕа санаата туолбутуттан, оскуола коллективыгар дириҥ махталын тиэрдэр. Бу курдук үөрэх, спорт аргыстаах үтүө холобурдар үксүү турдуннар, эр бэртэрэ уоланнар, сымса хоодуот уолаттар үрдүк ситиһии аргыстанныннар диэн алгыс тылларын этэбит.
https://clck.ru/3MHmw7