Муус устар 8 күнүгэр Аппааны бөһүөлэгин «Чороон» норуот айымньытын киинигэр «Нам улууһа Кыайыы суолунан» акция үрдүк тэрээһиннээхтик ааста.

Бу күн И.Е.Винокуров аатынан Хатыҥ Арыы орто оскуолатын Затоннааҕы ситэтэ суох орто оскуола үөрэнээччилэрэ, Намнааҕы техникум устудьуоннара, тэрилтэ салайааччылара, үлэһиттэрэ, общественность, нэһилиэк олохтоохторо, уопсайа 160-тан тахса киһи кыттыыны ылла.
Акция кыттыылаахтарыгар эҕэрдэ тылын Хатыҥ Арыы нэһилиэк дьаһалтатын депутаттарын Сэбиэтин бэрэссэдээтэлэ Евгений Геннадьевич Жирков эттэ. Хатыҥ Арыы нэһилиэгиттэн Аҕа дойду алдьархайдаах сэриитэ, элбэх сүтүгү, ыар тыыны аҕалбатах ыала диэн суоҕа буолуо.
Быйыл Улуу Кыайыы 80 сылын көрсө үгүс элбэх үбүлүөйдээх тэрээһиннэр улууска ыытыллаллар.
2025 сыл дааннайынан 1941-1945 с.с. сэриигэ ыҥырыллыбыттара — 303 буойун, сэрииттэн төннөн кэлбиттэрэ арҕаа сэрииттэн — 80 буойун, илин сэрииттэн — 43 буойун, кыргыс толоонугар геройдуу охтубуттар — 67 буойун, уоттаах сэриигэ сураҕа суох сүппүттэр — 124 буойун. Тыыл ветераннара — 423 киһи, о.и. 1946-1947 с. — 316 киһи, 1992-2000 с.с. — 107 киһи. Сэрии оҕолоро — 61 киһи статус ылбыта о.и. 15 тыыл ветерана. Сэрииттэн боевой орденнаах кэлбиттэр -15 тыыл ветерана.
Тобус толору саалаҕа мустан олорор акция кыттыылаахтарыгар Нам 2-с нүөмэрдээх орто оскуолатын 5 кылааһын үөрэнээччитэ Амелия Софронова, биир дойдулаахпыт «Коробейники» (сал Дмитрий Барабанов) ырыаларын бэлэх ууннулар. И.Е.Винокуров аатынан Хатыҥ Арыы орто оскуолатын нуучча тылын учуутала, СР үөрэҕириитин туйгуна Анна Ефимовна Васильева уонтан тахса сыл салайар «Чаҕылыс» литературнай бөлөх «Улуу Ильмень» дьүһүйүүнү, дириҥ ис хоһооннохтук, киһи сүрэҕин уйадытар гына ааҕан, дохсун ытыс тыаһынан көрүстүлэр.
И.Е.Винокуров аатынан Хатыҥ Арыытааҕы историяны уонна кыраайы үөрэтэр түмэл быыстапкалыыр салаа сэбиэдиссэйэ Людмила Васильевна Петрова уонна исписэлиис Алена Ивановна Соловьева «Музей в чемодане» экспонаттарын көрдөрдүлэр. Хатыҥ Арыы нэһилиэк Аҕа дойду сэриитин кыттыылаахтара Сивцев Спиридон Павлович, Охлопков Георгий Романович туһунан кэпсээтилэр, Василий Алексеевич Дягтеров генерал-майор, конструктор айбыт пулеметун, саллаат илдьэ сылдьыбыт флягатын, ньуоскатын көрдөрдүлэр.
Салҕыы айан акция кыттыылааҕа Туяра Петрова ыыппыт «Саха буойун суруйааччылара» ыйытык викторина боппуруостарыгар оҕолор күргүөмнээхтик эппиэттэстилэр. Саамай сөпкө эппиэттээбит И.Е.Винокуров аатынан Хатыҥ Арыы орто оскуолатын 5 «а» кылааһын үөрэнээччитэ Мирослав Максимов кыайылааҕынан ааттанна. Биир дойдулаахпыт, поэт, тылбаасчыт сахалары сэрии кэмигэр өлөртөн быыһаабыт, уостан түспэт норуот ырыатын ааптара И.Д.Винокуров – Чаҕылҕан «Хайыһар» ырыатын Ариан Васильев баянын доҕуһуолугар сүһүөхтэригэр туран акция кыттыылаахтара ыллаатылар.
Хатыҥ Арыы нэһилиэк депутаттарын сэбиэтин бэрэссэдээтэлэ Евгений Жирков «Кэм тууйаһыгар», баһылык Иван Ноговицын кэлэр ыччаттарга Улуу Кыайыы 100 сылын көрсө суруллубут суругу, үөрулээх быһыыга тууйаска укта.
Кыайыы автобуһа акция кыттыылаахтара түмүккэ «Чороон» норуот айымньытын киинин уус-уран салайааччыта Марианна Винокурова таһаарыытыгар оһуохайынан түмүктэннэ. https://clck.ru/3LQcDL Надежда Сивцева