Атырдьах ыйын 20 күнүгэр И.

М. Сосин аатынан улуустааҕы киин бибилэтиэкэ ааҕар саалатыгар кырдьаҕас коммунист, үлэ бэтэрээнэ, “Сэрии сылларын оҕото”, Майа сэлиэнньэтин, Бүтэйдээх, Тараҕай нэһилиэктэрин бочуоттаах олохтооҕо, Майа сэлиэнньэтин Ытык сүбэтин чилиэнэ, педагогическай үлэ, партия, сыана бэтэрээнэ, “Партияҕа килбиэннээх үлэтин иһин” орден кавалера, Өрөспүүбүлүкэҕэ социалистическай куоталаһыы кыайыылааҕа, Киров Лермонтов мэтээллэрин кавалера, ССРС Гражданскай оборонаҕа туйгуна, журналист, поэт, история үрдүк категориялаах учуутала, элбэх сылларга оскуолаларга история учууталынан үлэлээбит, советскай-партийнай үлэһит Анатолий Еремеевич Чыычаахап марксизм-ленинизм үөрэхтэригэр тирэҕирэн, социализм идеятыгар бэриниилээх, дьиҥнээх коммунистарга уонна сэбиэскэй былааска, дьоллоохтук олорон ааспыт олохпутугар, үлэбитигэр анаабыт араас сылларга суруйбут ыстатыйаларын түмэн оҥорбут «Социализм, Сэбиэскэй былаас туһугар» диэн ааттаммыт саҥа кинигэтин сүрэхтэниитэ буолла. Үөрүүлээх тэрээһини улуустааҕы киин бибилэтиэкэ кылаабынай бибилэтиэкэрэ Екатерина Дмитриева иилээн ыытта. Библиотека ааҕар саалатыгар Анатолий Еремеевич хатыҥ мастан кыһан оҥорбут экспонаттара, араас сылларга хаартыскаҕа түһэриилэрэ быыстапка буолан турдулар.
Саҥа тахсыбыт кинигэ Анатолий Еремеевич алтыс кинигэтэ буолар. Улуу Кыайыы 80 сылыгар ананан, “Сайдам” кинигэ хампаанньатыгар 50 ахсаанынан бэчээттэнэн тахсыбыт. Саҥа кинигэҕэ ааптар 2000 сылтан саҕалаан суруйуулара, ыстатыйалара киирбиттэр. Тэрээһин саҕаланыыта Анатолий Еремеевич кинигэ оҥоһуллуутун сырдатта. Салгыы саҥа кинигэ библиотечнай ырытыытын Екатерина Дмитриева оҥордо.
Мэҥэ Хаҥалас улууһун партийнай тэрилтэ бастакы сэкэрэтээрэ Валерий Васильевич Филиппов эҕэрдэ тыл этэн, Анатолий Еремеевичка коммунистическай партияттан бочуот грамотатын туттарда.
Бу күн кырдьаҕас коммунист, Хорообуттааҕы партийнай тэрилтэ чилиэнэ Александр Михайлович Андреев, спорт бэтэрээнэ, спорткомитет бэрэсэдээтэлинэн өр сылларга үлэлээбит Анатолий Константинович Захаров, Бүтэйдээх маҥнайгы сүһүөх партийнай тэрилтэтин сэкэрэтээрэ, педагог-бибилэтиэкэр Анна Ивановна Филиппова, Мэҥэ Хаҥалас улууһун партийнай тэрилтэ иккис сэкэрэтээрэ Анастасия Семеновна Кривошапкина, педагогическай үлэ, спорт бэтэрээнэ Ульяна Спиридоновна Шишигина, Павловскайдааҕы партийнай тэрилтэ чилиэннэрэ Людмила Кирсановна Оконешникова, Яков Алексеевич Яковлев эҕэрдэ тылларын эттилэр, кинигэ ааптарыгар махтаннылар, өссө да кинигэ 2-с туома тахсарыгар баҕа санааларын тиэртилэр.
Түмүккэ Анатолий Еремеевич саҥа кинигэтэ тахсарыгар өйөбүл буолбут маҥнайгы сүһүөх партийнай тэрилтэ сэкэрэтээрдэригэр кинигэлэрин бэлэх уунна.
#библиотекамк #презентациякниги