Бүгүн ыам ыйын 9 күнүгэр Д.

Ф.Ходулов аатынан норуот айымньытын дьиэтигэр Улуу Кыайыы 80 сылыгар аналлаах «Мэҥэ Хаҥалас оройуона Аҕа дойду Улуу сэриитин сылларыгар. 1941-1945 сс.» улуус дьаһалтата, Мэҥэ Хаҥаластааҕы кииннэммит бибилэтиэкэ ситимэ (дириэктэр Марианна Афанасьевна Никанорова), бары нэһилиэктэр холбоһуктаах 34 кинигэлээх бырайыактара киэҥ эйгэҕэ сүрэхтэниитин истиҥ түһүлгэтэ төрүттэннэ.
Тэрээһин саҕаланыыта Улуу Кыайыыны уһансыбыт, уйгулаах олоҕу бэлэхтээбит аҕа көлүөнэ дьоммут өлбөт мэҥэ ааттара сулус курдук сырдык буоллун диэн этэн туран, дьоһун дьоммут сырдык ааттарыгар анаммыт кинигэлэри бар дьоммутугар бу бырайыакка үлэлэспит улууспут бибилэтиэкэрдэрэ нэһилиэктэринэн наарданан кинигэлэрин тутан таҕыстылар. Саҥа кинигэлэр бэчээттэнэн тахсыыларыгар анаммыт уус-уран дьүһүйүүнү «Добун дорҕоон» эр дьон бөлөҕө толордо (салайааччы СӨ култууратын туйгуна Галина Васильевна Эверстова, хоһоон ааптара И.М. Сосин аатынан улуустааҕы киин бибилэтиэкэ кылаабынай библиограба Надежда Васильевна Сидорова).
Улуу Кыайыы 80 сылын көрсө «Мэҥэ Хаҥалас оройуона Аҕа дойду Улуу сэриитин сылларыгар. 1941-1945 сс.» СӨ национальнай уонна муниципальнай архыыптарыгар харалла сытар докумуоннарыгар олоҕуран тахсыбыт саҥа кинигэлэри сүрэхтиир чааһа бырайыак салайааччыта, «Мэҥэ Хаҥалас улууһа» муниципальнай оройуон баһылыга Дмитрий Иванович Тихонов эҕэрдэ тыл этиититтэн саҕаланна. Экраҥҥа видео нөҥүө бырайыак салайааччыта, үлэ тэрээһинин торумнааччы, кыраайы үөрэтээччи, РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна, Мэҥэ Хаҥалас улууһун, Майа, Хара нэһилиэктэрин Бочуоттаах олохтооҕо Софья Гаврильевна Дмитриева бу кэскиллээх бырайыак хайдах, туохтан саҕаламмытын, үлэ хаамыытын туһунан кэпсээтэ, санаатын үллэһиннэ.
Бүгүҥҥү бэлиэ күҥҥэ уһун сылларга сэрии кыттыылаахтарын ирдэһэн сүҥкэн үлэни оҥорбут нэһилиэктэр кыраайы үөрэтээччилэрэ, сурукка киллэрэн киэҥ ааҕааччыга тиэрдибит чиничийээччилэр, кинигэҕэ быһаччы үлэлэспит дьон кыттыыны ыллылар. Ол курдук тыл эттилэр: Саха Өрөспүүбүлүкэтин АИС-ЭЛАР электроннай фондатыгар үлэни тэрийээччи, кыраайы үөрэтээччи, СӨ үөрэҕириитин туйгуна, И.Г. Игнатьев аат. Хара орто оскуолатын библиотекарын, Хара нэһилиэгин Бочуоттаах олохтооҕо Октябрина Егоровна Дмитриева; кинигэ таһын, шмуцтитулларын оҥорууга үлэлээбит кыраайы үөрэтээччи, хомус норуоттар икки ардыларынааҕы түмэл исписэлииһэ Станислав Николаевич Афанасьев; нэһилиэк баһылыктарын ааттарыттан Мэҥэ нэһилиэгин баһылыга Александр Валериевич Куприянов; матырыйаал хомуйуутугар, архыып докумуоннарын чопчулуурга сүрүн үлэни ыыппыт улууспут нэһилиэктэрин бибилэтиэкэрдэрин аатыттан Нөөрүктээйи модельнай библиотекатын сэбиэдиссэйэ, СӨ култууратын туйгуна Нина Ивановна Колосова; улуус уонна нэһилиэктэр устуоруйаларын үйэтитиигэ биһиги кыраайы үөрэтээччилэрбит уруккуну уонна билиҥҥини ситимниир улахан суолталаах бырайыакка бэйэлэрин кылааттарын киллэрсэн киэҥ хабааннаах үлэлэспиттэрин туһунан кыраайы үөрэтээччи Мария Михайловна Слободчикова; кинигэ тахсыытыгар улуус дьаһалтатыттан эппиэттээх Анастасия Алексеевна Федорова.
#библиотекамк #презентациякниги