Ытык Күөлгэ ыытыллар ХХII Манчаары оонньууларын көрсө тахсыбыт Таатта спордун сырдатар саҥа кинигэлэри кытта билсиҥ!

-Мурунов А. Г. “Таатталар - Манчаарыга”: альбом-кинигэ. – Дьокуускай : Дани-Алмас, 2025. – 232 с.
Кинигэҕэ Манчаары оонньууларыгар Таатта спортсменнара биирдиилээн уонна хамаанданан хайдах кыттыбыттарын, спартакиадалар, оонньуулар дьоруойдарын туһунан кэпсэнэр. Элбэх хаартыскалар, араас кэмҥэ хаһыакка тахсыбыт ыстатыйалар киирбиттэр. Кинигэни РФ суруналыыстарын сойууһун чилиэнэ, хас да кинигэ автора, спорт бэтэрээнэ, улууска спорду салайбыт, коллекционер А. Г. Мурунов хомуйан оҥордо.
-Таатта хапсаҕайа / хомуйан оҥордо С. С. Ючюгяев ; редактор М. В. Сивцева – Ытык Күөл : “Таатта” хаһыат редакцията, 2025. – 248 с.
Кинигэҕэ Саха сиригэр спорт, хапсаҕай сайдыытын историятыттан саҕалаан номоххо киирбит хапсаҕайдьыттар, Тааттаттан хапсаҕайга спорт маастардарын туһунан сырдатыллар. Ону таһынан республикатааҕы хапсаҕай күрэхтэһиилэрин, “Саха арена” түһүлгэтин, атын да улуустар биллиилээх хапсаҕайдьыттарын кэпсиир матырыйааллар, хаартыскалар киирбиттэр. Кинигэни ССРС спордун маастара, учуутал, тренер, улууска спорду салайбыт С. С. Ючюгяев хомуйан оҥордо.
-Олоҕун тустууттан саҕалаабыта / хомуйан оҥордо А. К. Посельская. – Ытык Күөл : “Таатта” хаһыат редакцията, 2025. – 280 с.
Кинигэҕэ ССРС спордун маастара, Саха тустууктарыттан бастакынан Советскай Союз норуоттарын IV спартакиадатыгар кыттыбыт К. К. Луковцев олоҕо бииргэ тустубут табаарыстарын, бииргэ үлэлээбит доҕотторун, аймахтарын, дьиэ кэргэнин ахтыыларыгар, хаһыат ыстатыйаларыгар олоҕуран таҥыллыбыт. Аныгы технология көмөтүнэн К. К. Луковцев тыыннаах саҥатын, доҕотторун ахтыыларын, Швейцарияҕа туста сылдьар киинэтин көрүөххэ сөп. Кинигэни бииргэ төрөөбүт балта, “Таатта” хаһыат редактора А. К. Посельская хомуйан оҥордо.
Улууспут олохтоохторо, ыалдьыттар, саҥа кинигэлэри сэҥээрин! Кинигэлэр киин библиотекаҕа (Албан аат музейыгар) атыыланаллар.