Предыдущая публикация
Ижтимоий ҳимояга муҳтож қатламларга бир марталик пул тарқатилади
Президент қарорига биноан, пенсионерлар ва нафақа олувчиларга 300 мингдан 400 минг сўмгача бир марталик моддий ёрдам кўрсатилади. Кам таъминланган оилаларга бу оилалардаги ҳар бир бола учун 200 минг сўмдан берилади. Шунингдек, муайян тоифадаги эҳтиёжманд оилаларга ҳар бир оила аъзоси учун 20 килограммдан ун тарқатилади.
“Аҳолининг ижтимоий ҳимояга муҳтож қатламларини манзилли қўллаб-қувватлашга оид қўшимча чора-тадбирлар тўғрисида” президент қарори қабул қилинди.
Қарорга биноан, ижтимоий ҳимояга муҳтож аҳолининг қуйидаги қатламларига давлат бюджетидан бир марталик моддий ёрдам кўрсатилади:
а) ёшга доир, ногиронлик пенсияси ва нафақасини олувчиларга, болаликдан ногиронлик нафақасини ҳамда боқувчисини йўқотганлик пенсиясини ва нафақасини олувчи ҳар бир оила аъзосига ҳамда ўзгалар парваришига муҳтож ногиронлиги бўлган 18 ёшгача болаларнинг парваришлаш нафақасини олувчиларга:
Қорақалпоғистон Республикаси ва вилоятларда – 300 минг сўмдан;
Тошкент шаҳрида – 400 минг сўмдан.
Республика бюджети ҳисобидан бошқа органлар орқали пенсия олувчиларга тегишли вазирлик ва идоралар томонидан юқорида кўрсатилган шартларда ва миқдорларда бир марталик моддий ёрдам кўрсатилади.
б) “Ижтимоий ҳимоя ягона реестри” ахборот тизими орқали кам таъминланган сифатида моддий ёрдам олувчи оилаларга ҳамда кам таъминланган сифатида болалар нафақасини олувчи оилаларнинг ҳар бир 18 ёшга тўлмаган боласига – 200 минг сўмдан.
Бир нечта тоифа бўйича бир марталик моддий ёрдам олиш ҳуқуқига эга бўлган шахсларга бир марталик моддий ёрдам ҳар бир тоифа бўйича тўлаб берилади.
Бир марталик моддий ёрдам тўловлари икки ҳафта муддатда тўлиқ тўлаб берилади.
Уйида вақтинча бўлмагани ёки бошқа сабабларга кўра бир марталик моддий ёрдам пулларини ўз вақтида ололмаган фуқаролар тўланмаган моддий ёрдам пулларини 2022 йил 1 сентябрга қадар олиш ҳуқуқига эга.
Шунингдек:
“Темир дафтар”га киритилган, лекин мазкур қарорга асосан бир марталик моддий ёрдам пулларини олмаган эҳтиёжманд оилалар рўйхати тузилиб, “Саховат ва кўмак” жамғармаси маблағлари ҳисобидан ушбу оилаларнинг ҳар бир аъзосига 20 килограммдан бепул ун тарқатилади;
ижтимоий аҳволи оғир оилаларга “Саховат ва кўмак” жамғармаси ва бошқа манбалар ҳисобидан бепул ун тарқатилади ёки нақд пул кўринишида моддий ёрдам кўрсатиб борилади.
Следующая публикация
Нет комментариев