Ўзингизни ўйлаб қилмай ҳудбинлик,

Каттаю кичикни бахтиёр этинг.
Дўстгинам бу дунё ўзи беш кунлик,
Борларни борида қадрига етинг.
Ортга сураверманг бор дея имкон,
Яхшию ёмонга бўлинг меҳрибон,
Кейин душман бўлар сўнги пушаймон,
Борларни борида қадрига етинг.
Гулдайин умрини енгмасидан ғам,
Артинг кўзларида кўринмасин нам,
Аҳир одам тафтин олади одам,
Борларни борида қадрига етинг.
Чидар деб дилига берманг кўп озор,
Унда ҳам сиздайин қалб бор кўнгил бор,
Кетади баридан бўлганда безор,
Борларни борида қадрига етинг.
Тиллога тенг қилмай дийдорингизни,
Тез-тез йўқлаб туринг дўст ёрингизни,
Сурати босмайди ҳуморингизни,
Борларни борида қадрига етинг.
Сиз-ла эканлиги бағрин ўймасдан,
Меҳрга тўйдиринг жондан тўймасдан,
Вақт деган шавқатсиз олиб қўймасдан,
Борларни борида қадрига етинг.
Ажалга эшикни ёпа олмайсиз,
Кетганнинг ортидан чопа олмайсиз,
Эртага излаб ҳам топа олмайсиз,
Борларни борида қадрига етинг.
Яқинлар доғида куйгандан кўра,
Афсус надомадни туйгандан кўра,
Қабрига даста гул қўйгандан кўра,
Борларни борида қадрига етинг.