РОБИЪУЛ-АВВАЛ

Замин узра раҳмат ёғилди,
Шайтонларнинг йўли бўғилди,
Расулуллоҳ шу ой туғилди,
Кириб келди РОБИЪУЛ-АВВАЛ.
Чек қўйилди жаҳолатларга,
Замин тўлди саловатларга,
Малак тўлди самовотларга,
Кириб келди РОБИЪУЛ-АВВАЛ.
Кўмилмайди энди қизчалар,
Улашилди очга кулчалар,
Раҳмат тўлди ерга шунчалар,
Кириб келди РОБИЪУЛ-АВВАЛ.
Озод бўлди минг-минглаб қуллар,
Саҳоватга чўзилди қўллар,
Қадр топди ҳаттоки туллар,
Кириб келди РОБИЪУЛ-АВВАЛ.
Ўрнатилди адолат туғи,
Барбод бўлди зулмнинг тиғи,
Ўчирилди маъсият чўғи,
Кириб келди РОБИЪУЛ-АВВАЛ.
Мавлуд ой муборак бўлсин,
Ерга Ҳақнинг раҳмати тўлсин,
Расулуллоҳ ёвлари ўлсин,
Кириб келди РОБИЪУЛ-АВВАЛ.