Киштии уммеди ман шуд ғарқи тӯфони фано,

Дасти кӯтоҳам бигир, аз ин бало бинмо раҳо.
На давои дард дорам, на касе ҳамрози ман,
Дасти шавқат бар сарам бигзору кун тиморҳо.
Қуввати дигар надорам бори ҳиҷронат кашам,
То супорам ҷони ширин, як назар рӯят намо.
Нур аз чашмам рабуда сели хуноби ҷигар,
Хоки поят тӯтиё созам, шавам ё хоки по.
Раҳм кун бар ҳоли зорам, эй табиби дарди ишқ,
Дасти худ ҳаргиз намегирам зи домони Шумо.