Предыдущая публикация
Ньурба улууһуттан теннискэ маҥнайгы маастарга кандидат
Ыам ыйын 14-17 күннэригэр Бурятия республикатын Иволгинск нэһилиэгэр Бүтүн Арассыыйатааҕы «Даши Чойнхорлин” Буддийскай университетын бирииһигэр остуол тенниһигэр күрэх ыытылынна. 11 регионтан 150 ча спортсмен кэлэн кыттыыны ылла. Спортивнай разряд толорооһуннаах күрэх буолан, бу көрүҥҥэ биир көрдөрүүлээх спортсменнар кыттыыны ылар күрэхтэрэ буолла.
Паарнай разрядкаҕа Ньурба улууһуттан Степанов Айсен, Приморскай кыраай спортсменката Нефедова Ириналыын 2 миэстэ буолары ситистилэр. Айсен бу күрэх түмүгүнэн остуол тенниһигэр маастарга кандидат спортивнай разрядын толордо. Остуол тенниһин көрүҥэр бастакы маастарга кандидат буолар.
Бу спорт көрүҥэ улууспутугар кэлиҥҥи сылларга сайдан, улууска остуол тенниһин федерацията сүрдээх таһаарыылаахтык үлэлиир. Нэһилиэктэр икки ардыларынан ыытыллар комплекснай спартакиадаҕа киирбит биир спорт көрүҥүнэн буолар. Ньурбатааҕы оҕо спортивнай оскуолатыгар А.С. Кириллина, Чуукаар орто оскуолатыгар М.Д.Никифоров салайааччылардаах оҕолор дьарыктаналлар.
Бу көрүҥҥэ федерация өттүттэн туох үлэ, инники былаан баарын туоһулаһан улуус остуол тенниһин федерациятын салайааччыта С.Б. Дондокова санаатын иһиттибит: «Н.И. Бурнашев улуус баһылыгын солбуйааччытынан үлэлиир кэмигэр уонна улуустааҕы физическэй култуура уонна спорт управлениетын салайааччыта Р.А. Алексеев этиилэрин сөбүлэһэн, федерация салайааччыта буолбутум. Бастатан туран, бу көрүҥ маассабай спорт сайдыытыгар нэһилиэнньэҕэ тарҕатар сыаллаах уонна 2027 Ньурбабытыгар ыытыллар Спартакиадаҕа күүстээх хамаанда туруоран, кэрчик кэмҥэ биллиилээх теннисистэри кытта үлэлээн, уопут ылыы буолар. Бурятия республикатын, Кытай курдук биир чулуу омук спортсменнарын кытта сэргэ үлэлээн спортсменнарбыт маастырыстыбаларын үрдэтинэллэр.
Маны тэҥэ, чугас улуустары кытта үлэлээн үгүс күрэхтэри улуус, регональнай таһымнаах күрэхтэр ыытыллаллар. Быйыл Хаҥалас нэһилиэгэр 130 кыттааччылаах В.Т. Иванов аатынан күрэх ыытыллыбыта. Эһиил республиканскай күрэх ыытар баҕа санаалаахпыт.
Федерация туһунан кэпсээтээххэ, тоҕус чилиэннээхпит: «Ньурба куорат» баһылыгын солбуйааччыта П.С.Необутов, СЭГХ салайааччыта М.Н. Саввисов, «Аэропорты Севера» Ньурбатааҕы филиалын салайааччыта И.А. Акимов, урбаанньыттар Титова З.В., Николаева Н.В., федерация солбуйааччытынан Владимиров К.В. буолан үлэлии-хамсыы сылдьабыт.
Теннис көрүҥэ материальнай-техническэй хааччыйыытыгар үгүс үбү эрэйэр, онон үгүс бырайыактарга кыттабыт, быйыл эмиэ грантовай куонкурска сайаапка биэрдибит. Маны тэҥэ, нэһилиэккэ маассабай спорт сайдыытыгар хас биирдии нэһилиэккэ баар буолуутугар үлэлэһэн, улуус спорт управлениетын, нэһилиэк баһылыктарын кытта ыкса үлэ ыытабыт.
Ааспыт сылтан Чурапчытааҕы физическэй култуура уонна спорт институт студена, Ньурбабыт оҕото Степанов Айсены Санкт-Петербург куоракка дьарыктатабыт. Онон бу аҕыйах хонуктааҕыта Айсен ситиспит ситиһиитэ бу үлэ биир түмүгэ буолар, өссө да кыайыылар-хотуулар кэлэ туруохтара. Маҥнайгы маастарга кандидаттанныбыт, онон өссө да маастардар үүнэн-сайдан тахсан улуус спордун, имиджевай политикатын сайдыытыгар сүҥкэн оруоллаах буолуо.
Оҕолорбутун Улан-Удэҕэ ыыта сылдьыбыппыт, саас икки оҕо Кытайга сборданан кэллилэр. Бэс ыйын бүтүүтэ 20 оҕо Харбиҥҥа барыахтаахтар. Бу манна барытыгар төрөппүттэрбит төһүү күүс буолан, сүрдээҕин күүс-көмө буолаллар. Маны тэҥэ, улуус салалтата, улуустааҕы физическэй култуура уонна спорт управлениета, Ньурбатааҕы оҕо спортивнай оскуола өрүү өйөөн биир ситимнээхтик үлэлиибит» — диэн түмүктээтэ
Ити курдук федерацияларбыт сөптөөх үлэ ыытан, улууска маассабай спорт сайдыытыгар, үрдүк көрдөрүүлээх спортсменнар үүнэн-сайдан тахсалларыгар бэйэлэрин санааларын ууран үлэлиир дьоннор буолаллар.
Ньурбатааҕы спорт управление пресс-киинэ.
Следующая публикация
Нет комментариев