Ньурба түмэлигэр сайын бастакы күнүн көрсө "Сайын кэлиитэ" А.Е. Кулаковскай-Өксөкүлээх Өлөксөй айымньытынан моно-испэктээк буолла.
Саха норуодунай артыыһа Борис Иванович Борисов толоруутугар Өксөкүлээх Өлөксөй 100 сыл анараа өттүгэр Сэйимчээн сиригэр суруйбут поэматын бар дьон астына иһиттэ.
Бу поэма Өксөкүлээх Өлөксөй айымньыларыттан кээмэйинэн саамай улаханнара буолар. Айымньыга суруйааччы өрүс, үрэх эстиититтэн саҕалаан, үөн-көйүүр, көтөр-сүүрэр кэлиитин, айылҕа уһуктуутун, тыллыытын уонна сайыны уруйдуур ыһыах туһунан хоһуйар.
Кулаковскай "Сайын кэлиитин" суруйарыгар элбэх ыарахаттары көрсүбүтүн туһунан Борис Иванович кэпсээтэ. Кыһын аһылык, таҥас кырыымчыгар, дэлби тоҥон, аччыктаан олорон суруйбут айымньыта буолар.
Кулаковскай поэматын 17 күнүнэн суруйбутун Сэйимчээннээҕи күннүгүттэн билэбит: «…Была стряпка Мавра. Тирии кыһыахтаан баран сиэм диэбит субатын ыкка сиэтэн ытаата. Я делал салазки... Задался целью написать песню о лете», - бу олунньу 18-19 кк. суруйар.
Олунньу 23 к. «…Доставал лёд для окна. Пишу песню о лете. Плохо клеится». Кулун тутар 1-3 кк.: «Иду на поле пить чай. Сделал в лесу лежанку… Бродил по снегу, ища удобное место для уединения, но не нашел. Переписываю набело песню о лете». Кулун тутар 4-6 күннэригэр: «...Переписываю "Лето". Прибавил о четвероногих и рыбах... Пишу "Лето". Ходил на поле, пил чай...». Онтон кулун тутар 7 күнүгэр айымньытын суруйан бүппүтүн туһунан суруйар.
Тэрээһин Саха сиригэр Сайылык күнүгэр, А.Е. Кулаковскай-Өксөкүлээх Өлөксөй биэс сылын чэрчитинэн уонна М.Щепкин аатынан тыйаатыр училищетын III устуудьуйатын 50 сылыгар анаан буолла.
"Сайын кэлиитэ" саха литэрэтиирэтин биир чыпчаал айымньыта. Тыла-өһө баайа, дириҥ ис хоһооно, норуот олоҕун, ыра санаатын көрдөрүүтэ барыта баар. Бүгүҥҥү тэрээһиҥҥэ суруйааччы санаатын, тылын толору биэрбит Борис Иванович Борисовка өссө төгүл махталбытын, тапталбытын биллэрэбит!
Ньурба түмэлин пресс-сулууспата.
Присоединяйтесь к ОК, чтобы подписаться на группу и комментировать публикации.
Нет комментариев