Предыдущая публикация
📌 21 сакавіка адзначаецца Сусветны Дзень паэзіі.
Філіял "Казлоўская сельская бібліятэка" прапануе вашай увазе анлайн-гадзіну далучэння да паэзіі "Нашчадкам – у добры дар"
Сучасная беларуская дзiцячая паэзiя далучае падрастаючае пакаленне да агульначалавечых каштоўнасцей, да духоўных скарбаў народа, абуджае патрыятычныя пачуццi, заклiкае любiць свой край, берагчы яго непаўторную прыроду, паважаць чалавека працы, выхоўвае ў дзiцяцi лепшыя маральна-этычныя якасцi.
Адной з асаблiвасцей беларускай дзiцячай паэзii на сучасным этапе з’яўляецца цiкавасць да «самой гiсторыi дыхання» – даўняй культуры Беларусi, традыцый нашага народа.
Прырода – гэта адухоўлены вобраз прыгажосцi жыцця. Шматлiкiя творы пра прыроду маюць вялiкае пазнавальнае значэнне.
Шматлiкую групу сярод дзiцячых паэтычных твораў складаюць вершы маральна-этычнай праблематыкi, у якiх даходлiва, тактоўна аўтары распавядаюць, «што такое добра i што такое дрэнна». Тут і гумарыстычна-сатырычныя творы, якія расказваюць пра найбольш распаўсюджаныя заганы характару: ляноту, ганарыстасць, неахайнасць, сквапнасць.
Сучасная беларуская паэзiя для дзяцей характарызуецца жанравай разнастайнасцю: вершы, вершаваныя казкi, паэмы, калыханкi, забаўлянкi, жарты, лiчылкi, загадкi, скорагаворкi, пацешкi, чыстагаворкi i iнш.
Развіццё сучаснай беларускай дзіцячай паэзіі цесна паяднана з літаратурна-грамадскімі працэсамі апошніх дзесяцігоддзяў, дабратворны ўплыў якіх відавочны.
У ёй плённа працавалі выдатныя прадстаўнікі старэйшага паэтычнага пакалення: Э. Агняцвет, В. Вітка, С. Грахоўскі, С. Новік-Пяюн, М. Танк, С.Шушкевіч.
Да гэтага часу высокамастацкае паэтычнае слова дзецям прэзентавылі такія прызнаныя аўтары, як Р. Барадулін, Н. Гілевіч, А. Грачанікаў, В. Зуёнак, А. Лойка, К. Цвірка.
У апошнія дзесяцігоддзі ў дзіцячую паэзію ўвайшлі кнігі такіх таленавітых майстроў паэтычнага слова, выдатных знаўцаў дзіцячай псіхалогіі, як А. Вольскі, Н. Галіноўская, В. Гардзей, А. Дзеружынскі, К. Камейша, Г. Каржанеўская, У. Карызна, В. Лукша, У. Мазго, М. Маляўка, Н. Мацяш, М. Пазнякоў, С. Панізнік, Г. Пашкоў, П. Прануза, П.Прыходзька, М. Чарняўскі і інш.
Канец 80-х – 90-я гг. ХХ ст. – пачатак ХХІ ст. – час творчай актыўнасці ў галіне дзіцячай паэзіі А. Бадака, М. Бусько, А. Грачанікава, Х. Гурыновiча , М. Дуксы, К. Жука, Х. Жычкі, В. Жуковіча, Т. Кляшторнай, І. Курбекі, Д. Марозава, У. Марука, У. Мацвеенкі, І. Муравейкі, У. Паўлава, А. Пісьмянкова, Л. Пранчака, П. Саковіча, Ю. Цвіркі, П. Сушко, Я. Хвалея, В. Шніпа, У.Скарынкіна, Х.Чэрні, В. Шымука, Л. Шырына, Р. Яўсеева і іншых аўтараў, творы якіх адрасаваны маленькаму чытачу.
Творы гэтых паэтаў вучаць маленькага чалавека любіць свой край, ганарыцца яго людзьмі, выхоўваюць пачуццё нацыянальнай годнасці.
Творы пра «малую радзіму» робяць само паняцце бацькаўшчыны блізкім да «маленькага» свету дзіцяці, уводзяць яго ў мікракосмас, у якім адлюстроўваюцца сувязі і вытокі вялікага свету. Лірычны герой выразна ўсведамляе свае карані, сувязь з прыродай, гісторыяй, ён стаіць бліжэй да пазнання спрадвечных каштоўнасцей, без якіх будзе непапраўна збеднена яго душа.
У сувязі з наспелай неабходнасцю экалагічнага выхавання падрастаючага пакалення папулярнымі сталі творы, у якіх паэты звяртаюць увагу на неабходнасць берагчы прыроду
Сярод сучасных паэтычных твораў пра культуру беларусаў сталі сустракацца вершы, прысвечаныя рэлігійнай тэматыцы, якая не магла не з’явіцца як водгук на вяртанне страчанай духоўнай спадчыны
На хвалі нацыянальнага адраджэння ў дзіцячай паэзіі па-новаму загучала тэма роднай мовы, якая стала ўспрымацца як сімвал незалежнасці, праява нацыянальнай годнасці, вялікая духоўная каштоўнасць
З’явіліся вершы і па блізкай сучасным дзецям праблематыцы: напрыклад, пра празмернае захапленне камп’ютэрам.
Традыцыйна прысутнічаюць вершы выхаваўча-дыдактычнага характару, асновай якіх з’яўляецца станоўчы прыклад.
Паэты шырока ўключаюць у свае творы разнастайныя звесткі пра жывёльны і раслінны свет, таму яны не толькі забаўляюць, цешаць, а і непрыкметна вучаць маленькага чытача.
Такім чынам, асноўнымі тэндэнцыямі развіцця сучаснай беларускай паэзіі для дзяцей з’яўляюцца тэматычнае абнаўленне, пазбаўленне схематызму, ідэйная разняволенасць, як і раней, – выкарыстанне фальклорных набыткаў, звернутасць да навучальна-выхаваўчага працэсу.
Да гэтага дня у Казлоўскай сельскай бібліятэцы афрмлена кніжная выстава "Паэзія - гэта музыка душы"
Прыходзьце. бярыце, чытайце вершы беларускіх паэтаў.
#день_поэзии
#читаемдома
#онлайн_мероприятия_в_библиотеке
#БСГ_КозловскаяСельскаяБиблиотека
Следующая публикация
Нет комментариев