Предыдущая публикация
Хвала рукам, што вырасцілі хлеб
Самыя галоўныя ўдзельнікі абласнога свята «Дажынкі-2021» – гэта працаўнікі вёскі, тыя, хто араў, сеяў, убіраў, перавозіў, вырошчваў, падлічваў. Лідараў, якія занялі ў абласных спаборніцтвах другія і трэція месцы, шанавалі ў Вялікай зале райвыканкама.
Слова трымаў першы намеснік старшыні Віцебскага абласнога выканаўчага камітэта Алег Мацкевіч, які павіншаваў усіх прысутных з «Дажынкамі-2021». Алег Сяргеевіч адзначыў важнасць гэтай падзеі, падзякаваў сельскагаспадарчым калектывам вобласці за працавітасць, старанні, цярпенне і вытрымку – на палетках часам прыходзілася рупіцца ў нялёгкіх умовах надвор’я. Алег Мацкевіч узнагародзіў пераможцаў сельскагаспадарчых арганізацый, якія занялі ў вобласці другія і трэція месцы на ўборцы зерневых і зернебабовых культур, уборцы рапсу. Былі ўзнагароджаны лепшыя камбайнеры, вадзіцелі і механізатары на перавозцы зерня, на нарыхтоўцы травяністых кармоў на прэс-падборшчыках. Некаторым працаўнікам сельскагаспадарчых арганізацый была аб’яўлена Падзяка старшыні Віцебскага абласнога выканаўчага камітэта.
На сцэну запрашаецца старшыня камітэта па сельскай гаспадарцы і харчаванні Віцебскага аблвыканкама Сяргей Ягораў. Ён адзначыў, што ганарыцца хлебаробамі Віцебшчыны, якія дасягнулі важкіх вынікаў у рабоце. Сяргей Валер’евіч уручыў лепшым Падзякі Міністра сельскай гаспадаркі і харчавання Рэспублікі Беларусь лепшым аграномам, вадзіцелям, кіраўнікам сельгаспрадпрыемстваў.
Сярод узнагароджаных – кіраўнік сялянскай (фермерскай) гаспадаркі «Раднік» Юрый Сямёнаў. Такая пашана – за шматгадовую добрасумленную працу, значны асабісты ўклад у развіццё сельскагаспадарчай вытворчасці, дасягненне высокіх вытворчых паказчыкаў у вырошчванні элітнага насення шматгадовых траў, рапсу і зерневых культур. Многія прысутныя былі ўзнагароджаны Ганаровымі граматамі камітэта па сельскай гаспадарцы і харчаванні Віцебскага абласнога выканаўчага камітэта, сярод іх – механізатар ААТ «АграБаравінка» Сяргей Гоманаў, які сёлета паказаў лепшы вынік у раёне па намалоце зерневых і зернебабовых культур – 1271 тону.
Павіншаваць працаўнікоў сяла прыехала старшыня Віцебскага абласнога камітэта прафсаюза работнікаў аграпрамысловага комплексу Таццяна Ярома. Яна адзначыла важкі ўклад кожнага сельскага працаўніка ў агульны каравай Прыдзвіння, пажадала, каб у наступным годзе ён быў яшчэ больш важкім.
Таццяна Анатольеўна ўручыла прафсаюзныя знакі Гонару лепшым трактарыстам-машыністам вобласці, нагрудныя знакі «За заслугі» Рэспубліканскага камітэта Беларускага прафесійнага саюза работнікаў аграпрамысловага комплексу – некаторым старшыням раённых выканаўчых камітэтаў вобласці, дырэктарам прадпрыемстваў. Многія сельскія працаўнікі атрымалі Ганаровыя граматы Рэспубліканскага камітэта Беларускага прафесійнага саюза работнікаў аграпрамысловага комплексу.
Ганаровымі граматамі Віцебскай абласной прафсаюзнай арганізацыі Беларускага прафесійнага саюза работнікаў АПК і сертыфікатамі на санаторна-курортнае лячэнне ў санаторыі «Крыніца» былі адзначаны сталыя і маладыя перадавікі сельскай гаспадаркі. Сярод апошніх – 24-гадовы механізатар ААТ «Прыазёрны мір» Вадзім Гарланаў, які на сваім МТЗ перавозіць зерне і кармы, уздымае зябліва, прымае ўдзел у сяўбе сельскагаспадарчых культур.
Павіншаваць вясковых працаўнікоў вобласці каштоўнымі падарункамі ў Шуміліна прыехалі прадстаўнікі буйных прадпрыемстваў рэспублікі, на якіх вырабляюць і рамантуюць тэхніку. Генеральны дырэктар «Віцебскаблдарбуд» Уладзімір Мацвееў адзначыў, што на падрыхтоўцы да абласных «Дажынак» у Шуміліне працавалі 8 дарожных арганізацый вобласці, сіламі якіх зроблены 31 аб’ект агульным коштам больш як тры мільёны рублёў. А непасрэдным кіраўніком усім работ з’яўляўся намеснік старшыні райвыканкама Руслан Насцюшкін, якога Уладзімір Сямёнавіч павіншаваў на сцэне і ўручыў падарунак.
Следующая публикация
Нет комментариев