Сваё 85-годдзе сустрэў Заслужаны работнік народнай адукацыі БССР, Выдатнік народнай асветы, Выдатнік асветы СССР, былы дырэктар Лужкоўскай сярэдняй школы - Мілецій Андзілеўка.
Нарадзіўся Мiлецiй ў вёсцы Баравое, дзе і цяпер пражывае разам са сваёй спадарожніцай жыцця жонкай Надзеяй. Дарэчы, разам яны ўжо 61 год.
7 мая Мілецій Андзілеўка сустрэў свой чарговы юбілейны дзень нараджэння. Паважанаму ў грамадстве чалавеку споўнілася 85 гадоў. Многа гэта або мала? Напэўна, як і для любога чалавека, гэта значны адрэзак часу, у якім было мноства ўзлётаў, перамог, радасцяў і светлых дзён. Агульны працоўны стаж юбіляра складае 46 гадоў, з якіх 13 ён займаў пасаду дырэктара Лужкоўскай СШ. Пад яго кіраўніцтвам школа неаднаразова адзначалася як адна з лепшых навучальных устаноў краіны. Дзякуючы нястомнай працы настаўніцкага і вучнёўскага калектываў, разам з мясцовым лясніцтвам была адкрыта экалагічная сцежка па вывучэнні прыроды роднага краю, Музей прыроды. На пастаяннай аснове вялося цеснае супрацоўніцтва паміж школай і Батанічным садам.
Акрамя шматлікіх званняў, грамат і падзяк дырэктар Лужкоўскай СШ быў узнагароджаны медалём Францыска Скарыны пад нумарам 1. Гэтым фактам ён вельмі ганарыцца.
У дзень свайго юбілею, азіраючыся на пройдзены шлях, імяніннік падкрэслівае, што за ўсе свае дасягненні ён удзячны і настаўнікам, і вучням. У з’яднаным калектыве заўсёды панавалі згода, узаемавыручка і ўзаемадапамога — фундамент плённай працы навучальнай установы.
Кіраўніцтва раёна не змагло абыйсці ўвагай юбілейную дату былога кіраўніка Лужкоўскай СШ. Намеснік старшыні райвыканкама, Юрый Васілеўскі ўручыў імянінніку Падзяку кіраўніка раёна за шматгадовую добрасумленную працу ў галіне адукацыі, значны асабісты ўклад па навучанні і выхаванні падрастаючага пакалення, актыўную жыццёвую пазіцыю. Да віншаванняў далучылася таксама старшыня раённага Савета ветэранаў Ірына Міхалёнак, старшыня Лужкоўскага сельвыканкама Таццяна Краснадубская.
Не забываюць свайго былога калегу настаўнікі школы, вучні, якім ён даў пуцёўку ў шырокае самастойнае жыццё. Наогул, дом Мілеція і Надзеі Андзілеўкаў заўсёды гасцінна адкрыты для шчырых і сардэчных людзей.
Присоединяйтесь к ОК, чтобы подписаться на группу и комментировать публикации.
Комментарии 8